Pressemelding

Nr. 41/97
30.05.97

Jon Blaalid ny direktør for Statskonsult

Jon Blaalid er i statsråd fredag tilsett som ny direktør i Direktoratet for forvaltningsutvikling, Statskonsult. Blaalid kjem frå stillinga som ekspedisjonssjef i Kommunal- og arbeidsdepartementet. Tilsettinga gjeld for ein åremålsperiode på seks år.

Jon Blaalid er 50 år gammal med embetseksamen i sosialøkonomi frå Universitetet i Oslo i 1973. Frå 1974 arbeidde han i Statistisk sentralbyrå som konsulent, førstekonsulent og planleggar. I 1979 gjekk han over til Handelsdepartementet der han blei avdelingsdirektør i 1985. Han var også ansvarleg i Handelsdepartementet for samanslåinga med Utanriksdepartementet. Etter samanslåinga blei han i 1988 ekspedisjonssjef i Utanriksdepartementet med ansvar for fellesfunksjonar og konsulentverksemd.

I 1990 blei Blaalid tilsett som ekspedisjonssjef i Arbeidsmiljø- og sikkerheitsavdelinga i Kommunal- og arbeidsdepartementet. Denne avdelinga har ansvaret for det juridiske rammeverket knytt til arbeidsmiljø- og tryggingsspørsmål. Avdelinga har også omfattande kontakt med partane i arbeidslivet og styrer etatar som Arbeidstilsynet, Statens arbeidsmiljøinstitutt, Arbeidsforskningsinstituttet, Produktregisteret, Arbeidsretten, Riksmeklingsmannen, Direktoratet for brann- og eksplosjonsvern og Produkt- og elektrisistetstilsynet. Blaalids avdeling har også styringsansvar for Oljedirektoratet når det gjeld arbeidsmiljø og sikkerheit.

- I Jon Blaalid får Statskonsult ein direktør med solid bakgrunn som leiar og omfattande erfaring frå statsforvaltninga, seier planleggings- og samordningsminister Bendik Rugaas. - Det er også verdifullt at Blaalid frå si tid i Handelsdepartementet og Utanriksdepartementet har erfaring med modernisering og endringsleiing i fusjon av to organisasjonar med ulik kultur, ved sida av omfattande internasjonal erfaring og erfaring frå forhandlingar på høgt nivå, seier Rugaas.