Torstein Rudihagen utnemnd til statssekretær
Historisk arkiv
Publisert under: Regjeringen Jagland
Utgiver: Samferdselsdepartementet
Pressemelding | Dato: 01.11.1996 | Sist oppdatert: 21.10.2006
Pressemelding
Nr. 82/96
1.11.96
Torstein Rudihagen utnemnd til statssekretær
Ordførar Torstein Rudihagen, Sør-Fron i Oppland, er i statsråd i dag utnemnd til statssekretær i Samferdselsdepartementet. Han var statssekretær i Samferdselsdepartementet frå 3. mars 1995 til 26. oktober i år.
Rudihagen er 45 år og blei i 1976 utdanna som lærar ved Elverum lærarhøgskole. Han har også 1. avdeling juridikum og grunnfag i kroppsøving. Rudihagen har i 16 år arbeidd som lærar og rektor, i fleire skoleslag. Han har også arbeidd to år som pedagogisk konsulent i Sør-Fron kommune.
Rudihagen har vore medlem av Sør-Fron kommunestyre sidan 1984. Han har vore medlem av formannskapet i to periodar og leiar av hovudutvalet for kultur og fritid. Sidan 1992 har Rudihagen vore ordførar i Sør-Fron kommune. Han har hatt permisjon i den tida han har vore statssekretær.
Han har også bakgrunn som styreleiar i Midt-Gudbrandsdal næringsselskap og i arbeidsmarknadsverksemda Giax, nestleiar i Midt-Gudbrandsdal Energiverk, varaordførar i forstandarskapet for Oppland Energiverk og styremedlem i fleire interkommunale selskap.
Torstein Rudihagen har hatt ei rekkje verv i Det norske Arbeidarparti og er mellom anna nestleiar i Oppland Arbeidarparti.
Lagt inn 1 november 1996 av Statens forvaltningstjeneste, ODIN-redaksjonen