Pressemelding

13 mai 1997

Riksvegferjene:

Ingen reduksjonar i rutetilbodet

Samferdselsdepartementet legg til grunn at rutetilbodet for riksvegferjene i år skal førast vidare på om lag same nivå som i 1996.

Dette går det fram av ei orientering som er tatt inn i eit framlegg frå regjeringa om ein del saker som gjeld veg- og jernbaneformål.

I orienteringa blir det vist til at vegsjefane i fylka forhandlar med reiarlaga om rutetilbodet innanfor konsesjonsområdet til det enkelte reiarlag. - Forhand- lingane for 1997 er i sluttfasen. Etter det Samferdselsdepartementet kjenner til er det berre i Møre og Romsdal at forhandlingane har ført til nemnande reduksjonar. Hovudinntrykket frå forhandlingane i dei andre fylka er at det tilbodet som var i 1996 blir ført vidare i 1997. Nokre forbetringar av tilbodet ligg òg inne, som i sambanda Bruvik - Brimnes i Hordaland og Bodø - Moskenes i Nordland, går det fram av orienteringa.

Samferdselsdepartementet har bede Vegdirektoratet om å vurdere situasjonen etter at forhandlingane med reiarlaga er avslutta. - Dersom gjennomgangen til Vegdirektoratet skulle vise at det er gjennomført reduksjonar i rutetilbodet av nemnande omfang, vil vegkontora på nytt ta opp forhandlingar med reiarlaga om å oppjustere tilbodet. Eventuelle forhandlingar må ha som utgangspunkt at det skal vere rom for lokale justeringar i rutetilbodet ut frå endringar i lokale forhold frå 1996 til 1997. For Møre og Romsdal legg departementet opp til at ruteopplegget for 1996 skal vidareførast. Justeringa i rutetilbodet i Møre og Romsdal og eventuelle forhandlingar om justeringar av ruteopplegg i andre fylke, vil bli gjennomførte ved omprioriteringar innanfor tildelt ramme til riksvegvedlikehald til det enkelte fylke for 1997, går det fram av orienteringa.