Pressemelding

13 mai 1997

Ringeriksbanen:

Tilleggsløyving på 10 millionar kroner til hovudplanlegging

Regjeringa har i statsråd i dag gjort framlegg om ei tilleggsløyving på 10 millionar kroner over statsbudsjettet for 1997 til arbeid med hovudplanlegging av Ringeriksbanen, det vil seie ny jernbane mellom Sandvika og Hønefoss.

I statsbudsjettet for 1997 er det sett av 10 millionar kroner til hovudplanlegging, med utgangspunkt i val av "ein korridor". Framlegget om ei tilleggsløyving på 10 millionar kroner har samanheng med at Stortinget i november i fjor vedtok at det skulle gjennomførast hovudplanlegging for to ulike korridorar. Den eine korridoren omfattar "avgreining frå Sandvika og med traséføring vidare mot Hønefoss over Kroksund i Hole kommune", medan den andre korridoren gjeld "avgreining frå Sandvika og med traséføring vidare mot Hønefoss via Åsa".