"Forum for likestilling i arbeidslivet" etablert

P R E S S E M E L D I N G
Barne- og familiedepartementet

"Forum for likestilling i arbeidslivet" etablert

Likestillingsminister Grete Berget og dei største interesseorganisasjonane i arbeidslivet i Noreg etablerte i dag "Forum for likestilling i arbeidslivet". Formålet med Forum er mellom anna å forsterke innsatsen for å auke likestilling også i arbeidslivet.

På dette første møtet med statsråd Grete Berget i dag deltok representantar frå tunge arbeidstakarorganisasjonar som Landsorganisasjonen (LO), Yrkesorganisasjonenes Sentralforbund (YS), Akademikernes Fellesorganisasjon (AF) og Norsk Kommuneforbund (NKF) i tillegg til arbeidsgivarforeininga, Næringslivets Hovedorganisasjon (NHO) og Kommunenes Sentralforbund (KS). Formålet med Forum er å diskutere tiltak for å styrke innsatsen for dei mange kvinnene i arbeidslivet og finne moglege samarbeidstiltak.

- Forumet vil gjere det lettare for oss å gi gjensidig informasjon om tiltak for å auka likestillinga i arbeidslivet. I tillegg gir dette oss også ein eineståande moglegheit for å drøfte tema i forkant av viktige hendingar og sakar, understreka Berget.

Berget vil opne for at ein arbeidstakar som er lønsmessig forskjellsbehandla på grunn av kjønn, kan krevje av arbeidsgivar å få etterbetalt skilnaden mellom eksisterande løn og løna som vedkommande egentleg skulle ha hatt. Dette vil statsråden ha inn i likestillingslova. Likestillingsministeren framheva at likeløn må verte eit tema som får ei allsidig fokusering i Forumet for likestilling i arbeidslivet.

- På ein klart kjønsdelt arbeidsmarknad som den norske, må ein effektiv likelønsbestemmelse opne for samanlikning av arbeid på tvers av yrkesgrenser - noko dagens likelønsregel ikkje gjer, sa likestillingsministeren. Ho vil endre regelverket slik at samanlikning av løn på tvers av fag- og yrkesgrupper kan skje.

Likestillingsministeren peika på at den nyleg avvikla FNs kvinnekonferanse i Beijing viser at Noreg internasjonalt i eit likestillingsperspektiv står sterkt. Men samstundes vedgår ho at vi har ein mørk flekk på kartet vårt.

- I internasjonal samanheng peikar dei norske kvinnene sin svake representasjon i leiande stillingar i næringslivet seg ut som eit område vi har kome særleg kort. Kvinners potensiale som leiarar er ikkje utnytta, sa Berget. Ho meiner tida er mogen for ei radikal endring, og grunngir synet sitt med at det ikkje lenger er snakk om rettferd, men at det har å gjere med økonomiske omsyn. Dette grunngir ho med at dei skarpe skilja i arbeidslivet etter kjønn skaper rigiditet og arbeidsløyse på arbeidsmarknaden.

- Faktisk utnyttar ikkje næringslivet dei faglege ressursane kvinnene sit inne med, sa Berget.

Også moderne menn har familie. Dette temaet tok statsråden opp på etablerermøtet.

- Bedrifter må ha ein "familiepolitikk". Dersom vi skal ha håp om å få fleire kvinnelege leiarar i verksemdene og behalde dei mannlege, må tilhøva leggjast betre til rette for auka fleksibilitet for arbeidstakarar med barn - også for menn, oppmoda Grete Berget.