Pressemelding

Kommunal- og arbeidsdepartementet

Oslo, 04.10.95

STATSBUDSJETTET 1996

35 millionar kroner til Grenland og Østfold

Regjeringa aukar satsinga på omstilling og nyskaping. Det er gjort framlegg om å auka løyvinga frå 28,3 millionar kroner til 99,9 millionar kroner. Dette representerer ein auke på om lag 40 prosent. Det er satsinga på omstilling i Grenland/Østfold som er årsaka. Ein ynskjer nå å bruke 35 millionar kroner på omstilling i desse områda.

• Ein ny giv for industrien i Grenland og Østfold vil vera viktig både nasjonalt og lokalt, seier kommunal- og arbeidsminister Gunnar Berge.

Grenland og sentrale deler av Østfold har tradisjonelt vore nokre av dei tyngste industriområda i Noreg. Både Grenland og Østfold har hatt ein tilbakegang i industrisysselsettinga, som ligg godt over landsgjennomsnittet. Dette skuldast rasjonaliseringar og effektiviseringar i tradisjonell industri, som tretilverkingsindustrien eller i kunstgjødselproduksjonen. For Østfold sin del skuldast det òg ei total nedlegging av skipsbyggingsindustrien.

Gjennom auka satsing på omstilling i Grenland/Østfold ynskjer ein å skape nye og alternative arbeidsplassar, samstundes som det gjeld å utnytte dei industritradisjonane som allereie finst. Geografisk avgrensar ein satsinga på omstilling og nyskaping til sentrale deler av Østfold, til Grenlandskommunane og nokre omliggande kommunar. For Østfold vil den auka satsinga hovudsakleg omfatte industrikommunane Askim, Fredrikstad, Sarpsborg, Halden og Moss. Satsinga i Østfold må òg sjåast i samanheng med det grenseregionale programmet INTERREG og omstillingsarbeidet i regi av Østfold Industrioffensiv. For Grenlandsområde dreiar det seg om ei auka satsing på det pågåande omstillingsarbeidet gjennom selskapet "Vekst i Grenland" i kommunane Skien, Porsgrunn, Bamble og Siljan. I tillegg vil satsinga omfatte kommunane Kragerø og Nome i Telemark fylke og Risør og Tvedestrand i Aust-Agder fylke.