Pressemelding Statsbudsjettet 1997

74/96, 4 oktober 1996

668,7 mill kroner til scenekunstområdet

Det blir gjort framlegg om eit tilskot på totalt 668,7 mill. kroner til teater- og operaformål i 1997. Midlane går mellom anna til statsinstitusjonen Riksteatret, fem nasjonale institusjonar og 13 region-/landsdelsinstitusjonar på scenekunstområdet. Av nye midlar er lagt inn:

Trøndelag Teater

I 1997 vil det nye teaterbygget i Trondheim stå ferdig. Resten av løyvinga på 150 mill. kroner til bygget, 14,8 mill. kroner, vil bli utbetalt i 1997. Departementet gjer framlegg om ein auke i driftstilskotet til Trøndelag Teater på 2,3 mill. kroner i samband med innflyttinga i nytt bygg 1. mai neste år.

Rogaland Teater

Til utbygging av verkstadene på Rogaland Teater blir det gjort framlegg om ei tilsegn på 15 mill. kroner, og eit tilskot på 7,5 mill. kroner i 1997.

Hålogaland Teater

Til Hålogaland Teater blir det foreslått 1 mill. kroner til utarbeiding av byggjeprogram for nye teaterlokale og vidare prosjektering av alternative lokaliseringar.

Den Norske Opera

Regjeringa tek sikte på å leggje fram spørsmålet om nytt operabygg for Stortinget til våren.

Den Norske Opera får ein auke på 3 mill. kroner i tilskotet i 1997. Med dette framlegget tek departementet sikte på å tryggje den kunstnarlege utviklinga ved institusjonen. Det er også lagt inn ein auke på 1,3 mill. kroner til å styrkje ballettverksemda ved Den Norske Opera. Midlane skal brukast til å initiere ei aspirantordning med minst fire aspirantplassar, og til å styrkje operaballettens ordinære verksemd og turnéverksemd i Noreg. Formålet med ei aspirantordning er å styrkje rekrutteringa av unge norske dansarar til Nasjonalballetten.

Regjeringa tek sikte på å leggje fram ein odelstingsproposisjon om innlemming av ballettdansarar, songsolistar og korsongarar i Statens pensjonskasse i nær framtid.

Riksteatret

For 1997 gjer departementet framlegg om ein auke på 1 mill. kroner til turnéframsyningar av dans.

Nye Carte Blanche

Det er gjort framlegg om å auke tilskotet til Nye Carte Blanche med 0,2 mill. kroner. Midlane skal nyttast til å tilsetje ein ny dansar.

Frie Sceniske grupper

Norsk kulturråds midlar til frie sceniske grupper er auka med 1,8 mill. kroner til styrking av dans.

Operaen i Kristiansund

Løyvingane til Operaen i Kristiansund blir auka med 0,2 mill. kroner til styrking av sinfoniettaen.

Kontaktperson: Ekspedisjonssjef Sigve Gramstad, tlf. 22 24 80 00