Pressemelding Statsbudsjettet 1997

65/96, 4 oktober 1996

Riksutstillingar blir etablert

Riksutstillingar blir i haust skild ut frå Museet for samtidskunst og etablert som eigen statsinstitusjon med 13 tilsette. 3 nye stillingar blir foreslått oppretta i 1997. Det blir sett av 19,8 mill. kroner til Riksutstillingar neste år.

Riksutstillingar har ei sentral rolle i oppfølginga av den nasjonale planen for formidling av biletkunst og kunsthandverk. Institusjonen har også eit særskilt ansvar for å utvikle eit betre tilbod om kunstformidling til barn og unge, og har også fått ansvaret for vidareføring og utvikling av Pilotgalleria. Til oppfølging av Pilotgalleria og den nasjonale planen har departementet øyremerkt 2 mill. kroner av tilskotet for 1997.

Riksutstillingar skal skape interesse og forståing for biletkunst, kunsthandverk, fotografi og andre former for visuelle kunstnarlege uttrykk. Institusjonen skal stå for utstillingar og andre formidlingstiltak og på sikt fungere som rådgjevande organ for kommunar og fylkeskommunar når det gjeld formidling av visuell kunst. Ein tek sikte på å byggje opp institusjonen i løpet av ein fireårsperiode.

Kontaktperson: Ekspedisjonssjef Sigve Gramstad, tlf 22 24 80 00