P R E S S E M E L D I N G
Samferdselsdepartementet

2. januar 1995

Kyststamvegen:
VIDARE UTVIKLING ETTER "MIDTRE KORRIDOR"

• Regjeringa går inn for at den såkalla "midtre korridor" blir lagt til grunn for det vidare arbeidet med å planleggje stamvegen Kristiansand - Bergen - Trondheim.
• "Midtre korridor" vil, i grove trekk, seie at Kyststamvegen skal følgje E18 på strekninga mellom Kristiansand og Stavanger, riksveg 1 gjennom Hordaland, Sogn og Fjordane og fram til Bergsøy på Nordmøre i Møre og Romsdal. På strekninga vidare mot Trondheim skal Kyststamvegen følgje riksveg 71 langs Vinjefjorden og så riksveg 65 til Klett i Sør-Trøndelag og deretter E 6 fram til Trondheim.
• Anleggskostnadene for vidare utbygging etter "Midtre korridor" er rekna til om lag 9 milliardar kroner, med full stamvegstandard. Kostnadene blir 5-6 milliardar kroner med noko redusert standard.

Dette er nokre av hovudpunkta i ei stortingsmelding som Regjeringa la fram i statsråd i dag. Meldinga legg opp til ein overordna strategi for vidare utvikling av Kyststamvegen.

- "Midtre korridor", altså vidare utvikling av noverande vegsamband E18, riksveg 1 og riksveg 71/65, kjem vesentleg betre ut i analysane enn utbygging etter det andre hovudalternativet, som er utbygging av ein ferjefri "Ytre korridor". Det same gjeld også dersom ein samanliknar med alternativ som på visse delstrekningar er ein kombinasjon av dei to hovudalternativa. "Midtre korridor" har dei lågaste utbyggingskostnadene og gir størst samfunnsmessig nytte. "Midtre korridor" kjem også best ut når det gjeld trafikktryggleik og miljøkonsekvensar. I tillegg vil ein med dette alternativet i større grad få nytte av utbygginga av einskilde prosjekt innan "korridoren" etter kvart som dei blir bygde, medan ein ved utbygging etter "Ytre korridor" først vil få særleg nytte av utbygginga når lengre strekningar er ferdig utbygde.

OVERORDNA STRATEGI - FOR VIDARE PLANLEGGING OG AVKLARING

Stortingsmeldinga har som mål å komme fram til ein overordna strategi og val av "korridor" for vidare utvikling av vegsambandet mellom Kristiansand og Trondheim. Stortinget si handsaming av meldinga vil så vere eit grunnlag for eventuelle framlegg om investeringsprogram og val av trasé på delstrekningane. Slike framlegg vil bli tatt opp gjennom dei ordinære planprosessane, det vil seie gjennom arbeidet med Norsk veg- og vegtrafikkplan. Planlegginga vil skje i samsvar med reglane i plan- og bygningslova og vil bli følgd opp i dei årlege budsjettframlegga.

Det er ein føresetnad at vidare planlegging av sidevegnettet og tverrsamband blir sett i samanheng med hovudaksen nord-sør, og at Kyststamvegen blir samordna med andre transportformer. Ei slik samordning omfattar mellom anna jernbane, sjøtransport og spørsmål som gjeld sentralhamner og hamnestruktur, lufttransport og spørsmål i tilknytning til flyplassar og flyplasstruktur.

FÆRRE FERJESAMBAND - OG KORTARE REISETID

Ifølgje stortingsmeldinga skal den vidare planlegginga byggje på at dei tre ferjesambanda Sveio - Stord , Anda - Lote og Folkestad - Volda blir avløyst av faste vegsamband, slik at det langs Kyststamvegen dermed vil stå att seks ferjestrekningar. Når utbygginga etter "Midtre korridor" er ferdig, vil køyretida mellom Kristiansand og Trondheim, over Bergen - Ålesund, bli redusert med om lag fem timar i høve til dei 23 - 24 timane som det tar å reise med bil i dag.

NÆRMARE AVKLARING AV TO DELSTREKNINGAR

I meldinga blir det vist til at strekningane Stord - Halhjem og Nordfjordeid - Volda ikkje er tilstrekkeleg avklarte og derfor bør gjennomgå ei vidare overordna planlegging på fylkesplan og på kommunalt plan.

"YTRE KORRIDOR"

I arbeidet med meldinga og gjennom den lokale handsaminga er det greidd ut to hovudalternativ for ein Kyststamveg. I tillegg til "Midtre korridor", som i meldinga blir omtalt som "alternativ 1" har ein også vurdert ein "ytre korridor" langs kysten, omtalt som "alternativ 2" i meldinga. "Ytre korridor" er ferjefri, og er rekna å koste om lag 20 milliardar kroner med stamvegstandard. Med lågare standard blir kostnadene for ein ferjefri veg 13 - 14 milliardar kroner. Køyretida Kristiansand - Bergen - Ålesund . Trondheim blir redusert med 7 til 8 1/2 time, samanlikna med vegsambanda i dag.

Det er dessutan gjennomført utgreiingar som gjeld alternativ med ferjefrie kombinasjonsløysingar forbi Sognefjorden, sør for Ålesund og mellom Ålesund og Molde. Slike kombinasjonsløysingar er omtalt som "alternativ 3" i drøftinga av dei aktuelle strekningane.

Samferdselsdepartementet meiner at mange av dei lokale problema som er brukte som argument for å leggje Kyststamvegen langs ytre line, kan løysast like godt gjennom lokale tiltak, tverrsamband og utbygging av vegstrekningar med ein standard som er tilpassa det lokale trafikkgrunnlaget. Departementet legg også særskilt vekt på at utbygging etter det midtre alternativet vil vere vesentleg meir skånsamt mot det sårbare kystlandskapet enn det som er tilfellet for alternativet langs ytre line.

---

Lagt inn 19 juli 1995 av Statens forvaltningstjeneste, ODIN-redaksjonen