P R E S S E M E L D I N G
Samferdselsdepartementet

26. april 1996

Lovforslag:

Omdisponering av riksvegferjer for å sikre forsvarleg trafikkavvikling

For å sikre ei forsvarleg avvikling av trafikken med riksvegferjene vil staten skaffe seg lovheimel til å kunne omdisponere ferjeflåten. Heimelen kan nyttast når det er vanskeleg å avvikle trafikken på grunn av særleg stor trafikkauke, havari eller brot på vegsambandet, til dømes som følgje av ras. For å ta i bruk heimelen er det dessutan eit vilkår at ein ikkje har lukkast å komme fram til friviljuge avtalar med ferjereiarlaga om mellombels utleige av materiell.

Dette går fram av eit forslag til endring i samferdselsloven. I forslaget, som blei lagt fram i statsråd i dag, blir det mellom anna vist til at staten gir tilskot til drifta av ferjene og at staten dessutan gir garantiar ved ny- kontrahering av ferjemateriell. - Ferjene blir rekna som ein del av veg- nettet. Det er likevel slik at ferjedrifta i hovudsak er basert på private reiarlag eller andre reiarlag utan direkte offentlege styring. Fordi det er knapt med materiell i ferjeflåten, kan dette i særlege situasjonar gi reiarlaga ein sterk posisjon i tingingar om utleige, dersom ein berre skulle basere seg på avtaleløysingar, går det fram av grunngjevinga for forslaget.

Dersom omsynet til trafikkavviklinga tilseier det kan Samferdselsdeparte- mentet, etter lovforslaget, gi ferjereiarlag med ruteløyve i riksvegsamband pålegg om utleige av ferje til bruk i anna riksvegsamband i inntil seks månader. Denne perioden kan i særlege tilfelle forlengjast i inntil seks månader. I dei tilfella der det blir aktuelt å nytte lovheimelen kan kvar av partane krevje at vederlaget for tvungen avståing av materiell skal fast- setjast i samsvar med lov om skjønns- og ekspropriasjonssaker. Ifølgje forslaget kan det i særlege akutte tilfelle setjast i verk vedtak om omdisponering av ferjer straks - og før det er halde skjønn for fastsetjing av vederlag for utleige.

Informasjonssjef Ivar Torvik. Tlf. 22 24 81 08 (privat 22 60 21 42)