P R E S S E M E L D I N G
Sosial- og helsedepartementet

15.12.95       

St.meld. nr.16 (1995-96) Om røynslerr med lov om svangerskapsavbrot m.v.

Framleis rett til sjølvbestemt svangerskapsavbrot - førebyggjande arbeid skal verte intensivert

- Regjeringa vil halde fast ved at kvinner skal ha rett til sjølvbestemt svangerskapsavbrot innan utgangen av 12. svangerskapsveke. Utviklinga i talet på svangerskapsavbrot sidan lova trådde i kraft i 1979 og røynslene som er gjort, gir grunnlag for å halde fast ved denne retten. Regjeringa har som mål framleis å redusere talet på uønska svangerskap og svangerskapsavbrot i dei ulike aldersgrupper, og vil derfor intensivere det førebyggjande arbeidet på dette området, seier helseminister Werner Christie.

Stortingsmeldinga om røynsler med lov om svangerskapsavbrot vert lagt fram i statsråd 15. desember.

Talet på svangerskapsavbrot har gått ned med om lag10 prosent i løpet av dei siste fem åra. Nedgangen fell saman med den intensiverte førebyggjande innsatsen mot uønska svangerskap og abort. Etter at gjeldande lov om svangerskapsavbrot trådde i kraft 1. januar 1979 har talet på avbrot variert noko; med lågast tal i 1982 og høgast i 1989. Sidan 1989 har det vore ein kontinuerleg nedgang, og ein må tilbake til 1984 for å finne eit lågare tal avbrot.

I 1979 var det aldersgruppa under 20 år som hadde høgast aborthyppigheit. Frå slutten av 1980-talet har hyppigheita gått ned for denne gruppa. Det er i dag gruppa 20-24 år som har den høgaste aborthyppigheita.

Det førebyggjande arbeidet for å redusere talet uønska svangerskapsavbrot og abort, vil verte intensivert. Aldersgruppa 13-24 år og kvinner som har hatt fleire svangerskapsavbrot, representerer særskilte målgrupper. Som eit ledd i dette arbeidet, vil skuleundervisninga i samliv, seksualitet og prevensjon verte styrka og gjort obligatorisk på ungdomstrinnet 8.-10. klasse og i vidaregåande opplæring.

Statens helsetilsyn har, saman med fylkeslegane, gjennomført ei rekkje granskingar som ledd i tilsynet sitt med lov om svangerskapsavbrot. Desse viser at praktiseringa samsvarar med lova og dens intensjonar. Det er likevel behov for å følgje opp einkelde område tettare. Det gjeld det offentlege tilbodet om informasjon og rettleiing, meldepraksis og helsepersonellets reservasjonsrett.

Granskingar som gjeld informasjon og rettleiing viser at kvinner som vurderer svangerskapsavbrot, er gjennomtenkte i avgjersleprosessen og valsituasjonen. Det er positivt at fleire er involvert i avgjersleprosessen i dag enn tidlegare. Barnefaren deltar til dømes i avgjersleprosessen langt oftare no enn for 10 år sidan.

Utviklinga i talet på svangerskapsavbrot sidan lova trådde i kraft og røynslene som er gjort, gir grunnlag for å seie at lova fungerer tilfredsstillande. Det vert ikkje foreslått lovendringar. På grunn av den medisinsk teknologiske utviklinga er det likevel behov for oppdatering av forskrift og rettleiing.

Kontaktperson:
Statssekretær Ellen Strengehagen, tlf 22 24 84 06
Prosjektleiar Anne Berit Gunbjørud, tlf 22 24 84 19