Pressemelding

Nr. 124/96
11. oktober 1996

- Nobels fredspris ei anerkjenning av innsatsen for ei fredleg løysing på konflikten i Aust-Timor, seier Utanriksminister Godal.

- Tildelinga av Nobels fredspris til Carlos Felipe Ximenes Belo og José Ramos-Horta er ei anerkjenning av deira innsats for ei fredeleg løysing av konflikten i Aust-Timor, seier utanriksminister Bjørn Tore Godal. - Belo og Ramos-Horta har spela ei sentral rolle for å fremja menneskerettane i Aust-Timor gjennom ikkje-valdeleg innsats for dialog.

- Tildelinga er ei støtte til ei lita folkegruppe sin langvarige kamp for ei rettferdig ordning basert på sjølvråderett og respekt for deira kulturelle rettar, seier utanriksminister Godal. - Vi håpar at årets Nobelpristildeling vil medverka til å gje nytt liv i dei fastlåste forhandlingane mellom Indonesia og Portugal i FN-regi og internt mellom partane i Aust-Timor.

Noreg har støtta aktivt opp under biskop Belo sitt arbeid i Aust-Timor først og fremst gjennom organisasjonen Caritas Norge. I 1995 og 1996 er omlag 3 millionar kroner gitt i støtte til den katolske kyrkja sitt menneskeretts- og helsearbeid i området. - Vår støtte på dette området vil bli vidareført, seier utanriksminister Godal.