P R E S S E M E L D I N G
Utenriksdepartementet

26. mars 1996

Noreg inngår avtale om handel og økonomisk samarbeid med Russland

Utanriksminister Bjørn Tore Godal og Russlands første visestatsminister Oleg Soskovets underteikna i Oslo i dag ein avtale mellom Noreg og Russland om handel og økonomisk samarbeid. Avtalen vil regulere og fremme Noregs økonomiske samkvem med Russland og erstattar Langtidshandelsavtalen frå 1971 og Avtalen om økonomisk, industrielt og teknisk-vitskapleg samarbeid frå 1972 mellom Noreg og Sovjetunionen.

Avtalen om handel og økonomisk samarbeid vil sikre klare kjørereglar for handel og investeringar og bidra til å sikre norske bedrifter like gode vilkår i Russland som landet gir bedrifter frå andre land. Vidare fastset avtalen konkrete prosedyrar for løysing av tvistar om handel, og at oppgjer for varer og tenester i hovudsak skal skje i konvertibel valuta. Russland forpliktar seg i avtalen til å rette seg etter prinsippa til Verdshandelsorganisasjonen (WTO) sjølv om landet enno ikkje er medlem av organisasjonen.

Norsk eksport til Russland var i 1995 dobbelt så stor som i 1991. Frå 1994 til 1995 auka den frå 872 millionar til 1209 millionar kroner - ein framgang på 40 prosent. Auken skuldast hovudsakleg ein vekst på 85 prosent i eksporten av fisk, frå 237 millionar i 1994 til 440 millionar kroner i 1995. I januar 1996 var Russland Noreg sin sjette største eksportmarknad for fisk (hovudsakleg sild og makrell). Importen frå Russland gjekk sterkt fram i 1994, men viste ein svak tilbakegang i 1995 da den kom opp i 3750 millionar kroner. Fisk utgjer også en stor del av importen; i 1995 importerte vi fisk frå Russland for 1,1 milliardar kroner, i det vesentlege torsk. Samhandelen auka med nær 75 prosent frå 1992 til 1995.

Avtalen kan sjåast i samanheng med Noreg sitt arbeid for å utvikle eit moderne økonomisk avtaleverk med landa i Sentral- og Aust-Europa. Noreg har tidlegare i år inngått ein tilsvarande avtale med Kroatia. Ein tek i fyrste omgang sikte på å inngå liknande avtalar med Ukraina og Kviterussland.