UD - Pressemeldinger 1996 - Regjeringa foreslår ratifikasjon av PFP-statusavtalen
Historisk arkiv
Publisert under: Regjeringen Brundtland III
Utgiver: Utenriksdepartementet
Pressemelding | Dato: 26.04.1996 | Sist oppdatert: 21.10.2006
P R E S S E M E L D I N G
Utenriksdepartementet
26. april 1996
Regjeringa foreslår ratifikasjon av PFP-statusavtalen
Regjeringa har i dag i statsråd lagt fram ein stortingsproposisjon om samtykke til ratifikasjon av den såkalla PFP-statusavtalen for Stortinget.
PFP-statusavtalen regulerer det rettslege forhold mellom sendar- og mottakarstat for militære styrkar som deltar i øvingar i Partnarskap for fred-samarbeidet. Dette gjeld bl.a. innreisevilkår og straffe- og sivilrettslege forhold for soldatar som deltar i øvingar i PFP-land. PFP-statusavtalen inneber at NATO si statusavtale frå 1951 vert lagt til grunn ved militære øvingar i land som ikkje er medlemmer i NATO, men som er med i Partnarskap for fred.
Det er dessutan utforma ein tilleggsprotokoll til avtalen som set forbod mot at soldatar som deltar i slike øvingar i PFP-land skal kunne risikere dødsstraff som følge av lovgjevinga i mottakarstaten. NATO forutset at dei PFP-landa som sluttar seg til PFP-statusavtalen óg sluttar seg til tilleggsprotokollen. Sidan dette berre er ei politisk oppmoding som ikkje er rettsleg forpliktande, vil Regjeringa foreslå å ta atterhald ved ratifikasjon av PFP-statusavtalen slik at Noreg berre er bunden av avtalen i forhold til dei PFP-landa som óg vil ratifisere tilleggsprotokollen.
Både PFP-statusavtalen og tilleggsprotokollen vart underteikna, mellom anna av Noreg, i Brussel 19. juni 1995. PFP-statusavtalen vart sett i verk 12. februar 1996. Tilleggsprotokollen har enno ikkje teke til å gjelde.
Lagt inn 30 april 1995 av Statens forvaltningstjeneste, ODIN-redaksjonen