Regulering av fisket etter raudspette i Nordsjøen og Skagerrak i 2007

Fiskeri- og kystdepartementet har fastsett forskrift om regulering av fisket etter raudspette i Nordsjøen og Skagerrak i 2007. Den norske kvoten i Nordsjøen for 2007 er på 1.118 tonn, medan kvoten i Skagerrak er på 170 tonn. Dette er 487 tonn lågare enn kvoten i desse områda i fjor.

I reguleringane vert det som i tidlegare år lagt opp til å sikre fiskemuligheitene for det tradisjonelle raudspettefisket, samt hindre at det konvensjonelle fisket etter raudspette vert stoppa i løpet av året. For å sikre at den norske kvoten av raudspette blir teken vert gruppa av trålarar som kan fiske raudspette utvida i 2007, frå berre å gjelde bomtrålarar til også å gjelde fartøy med nordsjøtrålløyve og avgrensa nordsjøtrålløyve.

I fisket i Nordsjøen er det avsett 60 tonn til fartøy som fiskar med konvensjonelle reiskapar, medan 1.058 tonn tilfell trålarane.

I Skagerrak er det avsett 100 tonn til fartøy som fiskar med konvensjonelle reiskapar, og 70 tonn til trålarane.

Nytt for 2007 er at det vert sett ein maksimalkvote for trålfartøy som fiskar raudspette i Nordsjøen. Denne vert på 500 tonn, medan det i Skagerrak gjeld ein maksimalkvote på 30 tonn for desse fartøya. Fisket kan bli stoppa dersom totalkvoten eller gruppekvoten vert rekna for oppfiska.

• Forskrift om regulering av fisket etter raudspette i Nordsjøen og Skagerrak i 2007