Nytt register for individbasert pleie- og omsorgsstatistikk (IPLOS)

- Kommunane og sentrale styresmakter har no fått eit viktig reiskap for å kartleggje lokale og nasjonale behov for pleie- og omsorgstenester, seier statsråd Sylvia Brustad etter at Kongen i statsråd i dag stadfesta etableringa av eit nytt register for individbasert pleie- og omsorgsstatistikk (IPLOS-registeret).

Statsråden opplyser at registeret skal gje eit godt grunnlag for avgjerder knytta til fagleg og administrativ styring og planleggjing av innsatsen i pleie- og omsorgssektoren både på kommunalt og statleg nivå. Registeret vil auke kunnskapen om pleie- og omsorgstenestene, og det har vore etterspurd av kommunane over lengre tid. Registeret samlar eit sett av opplysningar om mellom anna tenestemottakarens behov for tenester, kva slags tenester dei mottek, omfanget av tenestene og rørsler mellom kommunale tenester og ikkje-kommunale døgntilbod.

Helse- og omsorgsminister Sylvia Brustad seier at det no er viktig at kommunane gjennomfører dei pålagde innsendingane av data, slik at registeret vert komplett så raskt som mogleg.

Kontaktperson: Bjørn Stene Hansen, 22 24 85 87