- Endringane i tomtefestelova som blir sett i kraft 1. juli 2006 vil gi 150.000 til 200.000 bustadeigarar styrka innløysingsrett til tomta som huset står på, seier justisminister Knut Storberget. Samstundes blir tomtefesteforskrifta endra og det blir gitt nærare overgangsreglar. Endringane i lova var ei oppfølging av Soria Moria-erklæringa.

Stortinget vedtok i si siste arbeidsveke før sumarferien dei lovendringane som regjeringa hadde gjort framlegg om. Kongen i statsråd vil etter framlegg frå justisministeren fredag 30. juni 2006 sanksjonere lovendringane, setje endringane i kraft frå 1. juli 2006, endre tomtefesteforskrifta og gi nærare overgangsreglar.

Dei mest vesentlege nye reglane blir desse:

• Bustadfestarane får innløysingsrett anna kvart år, i motsetnad til i dag kvart tiande år.
• Det blir ikkje innløysingsrett for hyttetomter i statsallmenning. Her blir det eit unntak frå innløysingsretten, slik det er i bygdeallmenningane. Eigarane av festa bustadtomter i statsallmenning får løyse inn tomtene. Unntaket vil også gjelde på Finnmarkseigedomens grunn i Finnmark.
• Det blir ikkje innløysingsrett for hyttetomter knytte til landbruk der festeinntektene utgjer meir enn fem prosent av gardens nettoinntekter. Landbrukseigedomen må likevel også fylle andre krav for å kunne pårope seg unntaket, mellom anna eit minstearealkrav.

• Det blir innført ein angrerett for festare som har kravd innløysing av tomta, dersom det viser seg at innløysingssummen blir for høg. Bortfestarens kostnader knytte til kravet må bli erstatta av festaren, dersom angreretten blir brukt.
• Det blir gjort nokre reint prosessuelle endringar.
• Eit utgangspunkt for overgangsføresegnene vil vere at dei endringane som er direkte avgjerande for om nokon har innløysingsrett eller ikkje, skal gjelde der krav om innløysing blir fremja på grunnlag av at innløysingstida er inne eller festetida er ute 1. september 2007 eller seinare. Regelen for Finnmarkseigedomen og nokre andre endringar vil gjelde frå 1. juli 2006, utan noka nærare overgangsføresegn.

Reglane blir kunngjorde på www.lovdata.no.