I dag delte kultur- og kyrkjeminister Trond Giske ut Olav- og Sunnivastipenda. – Årets stipendmottakarar har levert prosjekt som tek opp viktige tema i det kyrkjelege landskapet, seier statsråden.

Olavstipendet går til Anne K. Dalen. Elisabeth Maria Amundsen og Toril Stangnæs mottek Sunnivastipendet.

Anne K. Dalen, sokneprest i Strømmen, får Olavstipendet for prosjektet «Norsk kvinnelig teologforening fra 1958-2008 – fra interesseforening til kirkelig aktør».

– Norsk kvinneleg teologforeining har spelt ei sentral rolle i det norske kyrkjelandskapet. Når foreininga no fyller 50 år, er det viktig både for kyrkja, foreininga og for kvinnene sine vilkår i kyrkja at historia blir skriven, seier Giske.

Dalen mottek kr. 100 000 i stipend. Ho får eitt års permisjon med lønn frå stillinga som sokneprest i Strømmen for å fullføre arbeidet.

Elisabeth Maria Amundsen og Toril Stangnæs frå Hamar bispedømme får Sunnivastipendet for prosjektet «– og du skal lage hellige klær».

– Korleis kan kunst og det visuelle møte menneske på måtar som gjer at dei kjenner seg heime i kyrkja og med kyrkjas bodskap? Dette prosjektet vil kanskje gi svar som kan kome både kyrkja og mange kyrkjelydar til gode, seier Giske.

Amundsen og Stangnæs får til saman kr 50 000 i stipend.