Butikkane som er med i det merkantile kompetanseprogrammet for utkantbutikkar (MERKUR) opplever ei betring av servicetilbodet. Kommunal- og regionalminister Åslaug Haga ynskjer vidare satsing på MERKUR.

– Det er ei viktig oppgåve for oss å støtte opp om arbeidet som butikkdrivarar gjer i mange lokalsamfunn. Mange butikkar i distrikta balanserar på ei smal line når det gjeld lønsemd, samstundes som dei er viktige institusjonar i mange bygdesamfunn, seier statsråd Haga.

MERKUR er eit nasjonalt kompetanseprogram som vert finansiert av Kommunal- og regionaldepartementet for å styrke og utvikle butikkar i distrikta. Det er sett av sju millioner kroner til MERKUR programmet for 2006. Departementet har også ansvar for eit utviklingstilskot til dei mest marginale butikkane på fem millionar kroner for 2006.

Over 700 butikkar i 550 lokalsamfunn har vore med i MERKUR-programmet. Hovudtyngda av desse butikkane ligg i Nord-Norge og på Vestlandet. 75 butikkdrivarar har vore intervjua i samband med evalueringa av MERKUR. Tilbakemeldinga er i hovudsak svært positiv på det arbeidet MERKUR gjer. MERKUR stør opp om utvikling av tilleggstenester som post i butikk, turistinformasjon, kommunal tenester og tippekommisjonær.

– Evalueringa syner at det er eit potensial for å betra samarbeidet mellom MERKUR, butikkdrivarar og kommunal forvaltning, slik at kommunane tek med seg butikkane som ei viktig kraft i det lokale utviklingsarbeidet rundt i mange bygdesamfunn, seier statsråden.

• Med utkantbutikken i sentrum
  Evaluering av Merkantilt kompetanseprogram for utkantbutikkane i regionane

Kommunal- og regionaldepartementets pressetelefon: 22 24 25 00.