Kommunal- og regionaldepartementet (KRD) vil auke innsatsen på programsatsingar i Innovasjon Noreg til 130,5 millionar kroner i 2006. Den nye satsinga Norwegian Centres of Expertise utgjer ein viktig del av auken.

20 millionar kroner blir sett av til det nye programmet Norwegian Centres of Expertise som blir starta i 2006. Fleire aktuelle miljø har søkt midler om å få status Norwegian Centres of Expertise. Kven som får penger blir avgjort i løpet av våren. Frå før av har Ålesund, Horten og Raufoss slike senter. Norwegian Centres of Expertise er retta mot spesialiserte klynger med konkurransedyktige bedrifter, der programmet skal medverke til å byggje næringsmiljø i verdsklasse gjennom å fremje mellom anna godt samarbeid mellom FOU-miljø og næringslivet. Programmet er eit samarbeid mellom Innovasjon Noreg, SIVA og Forskingsrådet med finansiering frå både Kommunal- og regionaldepartementet og Nærings- og handelsdepartementet.

– Dette er eit spanande tiltak som eg har stor tru på skal gje positive resultat i dei områda der programmet blir etablert, seier kommunal- og regionalminister Åslaug Haga.

Ved sidan av Norwegian Centres of Expertise har regjeringa auka midlane til kulturbasert næringsutvikling og arbeidet med å fremje entreprenørskap blant kvinner og ungdom. Midlane som blir kanalisert gjennom Innovasjon Noreg skal saman med midlar til andre nasjonale og regionale aktørar medverke til ei god regional utvikling.

Den auka innsatsen på Innovasjon Noreg er ein del av eit distriktspolitisk løft som Regjeringa ynskjer å gjennomføre. Målet er å leggje til rette for likeverdige levekår og auka verdiskaping i heile landet, slik at folk har reell fridom til å bu der dei vil.

Kommunal- og regionaldepartementet sin pressetelefon: 22 24 25 00.