WTO: Høg aktivitet i WTO i tida framover

WTO: Det er forventa at landbruksforhandlingane i WTO vil ta til att etter at forhandlingsleiar Crawford Falconer i midten av juli legg fram eit nytt utkast til forhandlingstekst. Det førre utkastet vart lagt fram i juli 2006 utan at det førte til eit gjennombrot i forhandlingane.

Siste veka i juli vert det uformelt forhandlingsmøte i Geneve for å diskutere det nye utkastet. Diskusjonen held fram i Geneve fra 3. september. Det kan også bli reviderte versjonar av forhandlingsteksten kommande haust.

Målsettinga i forhandlingane er no at det skal skje eit gjennombrot og ei avklaring i løpet av 2007. Etter samanbrotet i G 4 (EU, USA, Brasil og India) - møtet i Potsdam i juni, er forhandlingane no attende på det multilaterale sporet i Geneve.

Parallelt med landbruksforhandlingane vil det vere tilsvarande prosessar på industrivarer. Ulikt syn på tollsatsar for industrivarer var hovudårsaka til at Potsdammøtet i juni braut saman.