Sertifiseringsordning for reiselivet

Regjeringa vil etablera ei frivillig sertifiseringsordning for reiselivsbedrifter som vil marknadsføra seg som ein del av den norske merkevara. På denne måten får dei reisande moglegheit til å samanlikna ulike leverandørar, til dømes når ein ferietur vert planlagt på Internett. Målet er høgare kvalitet.

- For å sikra ein direkte samanheng mellom det me marknadsfører i utlandet og det dei norske reiselivsnæringane faktisk kan tilby skal me etablera ei ordning med sertifisering, seier nærings- og handelsminister Odd Eriksen.

For å verta sertifisert vil det bli stilt krav til ein viss standard på dei produkta næringa tilbyr. Eriksen seier at dette vert gjort for å sikra ein høgast mogleg kvalitet på reiselivsprodukta.

- I reiselivssamanheng skjer ofte planleggig og bestilling av reisa i god tid på førehand. Sertifisering skal gje kunden eit betre grunnlag for å samanlikna tilbod og å vita at det som vert bestilt er i samsvar med det han ønskjer, seier Eriksen.

Det vert no etablert ei arbeidsgruppe som skal vurdera korleis ordninga skal utformast. I arbeidsgruppa er Nærings- og handelsdepartementet, Innovasjon Norge og Reiselivsbedriftenes Landsforening representert.

- Det er viktig at ei ny sertifiseringsordning ikkje vert oppfatta som ei ekstra byrde for reiselivsbedriftene, seier Eriksen. - Ordninga er meint å vera eit hjelpemiddel, slik at bedriftene kan finna sin plass i den norske merkevara.

I statsbudsjettet for 2006 er det sett av 172,5 millionar kroner til marknadsføring av Noreg i utlandet. Dette er ein betydeleg auke frå i fjor. I februar legg Innovasjon Norge fram ein revidert strategi for merkevarebygging av Noreg, der det vil koma fram kvar Noreg har størst potensial for å henta nye reisande.

Les meir om saka på nrk.no:
http://www.nrk.no/nyheter/okonomi/5397513.html

Ei ny sertifiseringsordning skal vera eit kvalitetsstempel for norsk reiselivsnæring.
(Foto: Jørn Tomter/Finnmark Reiseliv)


16. januar 2006