Pressemelding

Nr.: 47/06
Dato: 30. juni 2006
Kontaktperson: Informasjonsrådgjevar Arvid Samland, tel. 93 05 14 58

Nytt såkornfond til Førde

Administrasjonen for det distriktsretta såkornfondet for Sør- og Vestlandet vert lagt til Førde. Fondet på 196,8 millionar kroner skal bidra til auka nyskaping, ved å sikra betre tilgang til risikokapital.

– Ved å finansiera nye, lovande prosjekt vil såkornfondet bidra til auka nyskaping på Sør- og Vestlandet. På denne måten får me eit breiare grunnlag for morgondagens vekst og velstand, seier nærings- og handelsminister Odd Eriksen.

Staten bidrar med 134 millionar kroner til fondet for Sør- og Vestlandet. Private investorar skal bidra med resten. Fondet er godkjent av EFTAs overvakingsorgan ESA, og skal investera i såkalla B- og C-kommunar i Agderfylka, Rogaland, Hordaland og Sogn og Fjordane. Innovasjon Norge skal plukka ut eit forvaltarmiljø i løpet av juli.

– Saman med eksisterande ordningar i Innovasjon Norge ligg det no betre til rette for utvikling av eit innovativt næringsliv i dei fem fylka, seier Eriksen. – Fondet vil bidra til ytterlegare finansieringsmoglegheiter for nystarta bedrifter på Sør- og Vestlandet.