Pressemelding

Nr.: 92/06
Dato: 24. november 2006
Kontaktperson: Informasjonsrådgjevar Arvid Samland, tel. 22 24 65 60

Regjeringa vil auka aksjekapitalen i Kings Bay AS

Regjeringa foreslår å auka aksjekapitalen i Kings Bay AS med 5 millionar kroner. Det går fram av haustens endringsproposisjon til statsbudsjettet 2006.

– Kings Bay AS er eit viktig selskap for dei som driv forsking på Svalbard. Auka eigenkapital gjer Kings Bay betre rusta til å takla utfordringane med å halda forskingsstasjonane i Ny-Ålesund opne heile året, seier nærings- og handelsminister Dag Terje Andersen.

Kings Bay AS eig grunnen og det meste av bygningane i Ny-Ålesund. Selskapet yt infrastrukturtenester til forsking og naturvitskapleg verksemd. Ny-Ålesund, med plassering langt mot nord og enkel tilkomst, har stor betydning for polar- og klimaforskinga.

– Drifta av Kings Bay vert med dette styrkt, noko som er viktig. Fleire vitskaplege prosjekt er venta sett i gang på Svalbard, blant anna som følgje av det komande internasjonale polaråret 2007-2009, seier Andersen.

I løpet av dei ti siste åra har Ny-Ålesund utvikla seg til å verta eit senter for arktisk forsking på Svalbard, og det har vore fleire store utbyggingar på staden. Det siste store prosjektet var det arktiske marinlaboratoriet, som vart ferdig i 2005.