Pressemelding

Nr.: 10/06
Dato: 14. februar 2006
Kontaktperson: Informasjonsrådgjevar Arvid Samland, tel. 22 24 65 60

Styrkjer samspel og innovasjon gjennom SIVA

Regjeringa styrkjer satsinga på innovasjonsfremjande aktivitetar i 2006. Nærings- og handelsdepartementet løyver 30 millionar kroner ekstra til SIVA, og pengane skal blant anna brukast til å etablera eit norsk-russisk innovasjonssenter i Barentsregionen.

Satsinga følgjer opp Soria Moria-erklæringa om å auka støtta til næringsutvikling gjennom det etablerte verkemiddelapparatet. Den største delen av pengane, 8 millionar kroner, går til å utvikla SIVAs inkubatorprogram som skal styrkja samarbeidet mellom forskings- og utviklingsmiljøa og næringslivet.

– Inkubatorar aukar sjansane for at forskingsresultat og gode forretningsidear kan utnyttast kommersielt. På den måten kan det skapast nye arbeidsplassar, seier nærings- og handelsminister Odd Eriksen.

SIVA er ein pådrivar for oppbygging av sterke verdiskapingsmiljø over heile landet. Nettverksarbeid og investeringar i eigedom og innovasjonsselskap er dei viktigaste oppgåvene i selskapet.

Styrking av næringssamarbeidet med Nordvest-Russland vert også eit viktig satsingsområde for SIVA i år. Dei siste 10-15 åra har SIVA fått eit stort nettverk og god kompetanse om næringslivet i Nordvest-Russland, blant anna ved at selskapet eig og driftar ein næringspark i Murmansk. I løyvingane til SIVA er det sett av 4 millionar kroner til etablering av eit nytt norsk-russisk innovasjonssenter i Barentsregionen.

– Barentsregionen er eit område med store moglegheiter i blant anna olje- og gassektoren og marine næringar. Regjeringa ønskjer å føra ein aktiv politikk for å støtta opp under det norsk-russiske næringslivssamarbeidet, seier Eriksen.

Norwegian Centres of Expertise (NCE) er eit nystarta samarbeidsprosjekt mellom SIVA, Innovasjon Norge og Noregs forskingsråd. Målet er å stimulera til innovasjonsprosessar i regionale klynger med internasjonalt orienterte bedrifter.

– Regjeringa vil satsa på utvikling av senter for spisskompetanse på ulike stader i landet, og NCE vil vera ein viktig pådrivar i denne samanhengen. Prosjektet er også viktig ved at det kan styrkja samspelet mellom SIVA, Innovasjon Norge og Noregs forskingsråd, seier Eriksen.

Arbeidet med å skapa eit sterkt verkemiddelapparat som er ein fleksibel partnar for næringslivet, er eit sentralt punkt i Soria Moria-erklæringa.