Fleire og betre sykkelvegar i Oslo

- Regjeringa vil legge til rette for auka sykkelbruk og vil mellom anna sette av 14 millionar kroner til sykkelsti på Skøyen. Det sa statsminister Jens Stoltenberg då han og samferdselsminister Liv Signe Navarsete besøkte prosjektet torsdag.

Regjeringa samarbeider no med Oslo kommune og Statens vegvesen om effektiv utbygging av gang- og sykkelvegar i Oslo.

 Torsdag sykla Stoltenberg og Navarsete langs E18 ved Skøyen i Oslo. På denne strekninga kan det vere opptil 800 syklistar i timen, samstundes som biltrafikken er svært høg. I 2008 skal ein gang- og sykkelveg vere klar i dette området, og regjeringa vil no altså sette av 14 millionar kroner til dette prosjektet, sa samferdselsminister Navarsete.

- Regjeringa ynskjer fleire over på sykkelsetet, ikkje minst til og frå arbeidsplassen. Men då må vi ha på plass fleire gode og trygge sykkelvegar, både her i Oslo og i andre byar. Sykkelvegar er bra for miljøet og bra for helsa til den som syklar, sa statsminister Stoltenberg.

Soria Moria-erklæringa slår fast at regjeringa vil satse meir på sykkelvegar, for å gjere det tryggare for syklistane og for å betre trafikktilhøva. Eit viktig mål er at fleire skal bruke sykkel på veg til og frå arbeidet, særskilt i byane.

Regjeringa vil bruke meir pengar, men legg også vekt på eit godt samarbeid mellom stat, fylker og kommunar. I Oslo er det no lagd ei arbeidsgruppe, der Samferdselsdepartementet saman med kommunen og Statens vegvesen skal samordne arbeidet med utbygging av fleire sykkelvegar i Oslo.

 

Prosjektet på Skøyen er ein del av arbeidet med å bygge ein samanhengande hovudsykkelveg langs ring 2 i Oslo. Statens vegvesen arbeider med planane for denne parsellen, og desse skal seinare handsamast i Oslo kommune. Byggestart vert tidlegast hausten 2008. Hovudsykkelvegnettet som er planlagt i Oslo skal vere 180 km. Staten har ansvar for 115 km og Oslo kommune 65 km.

Det er i dag om lag 3200 km med gang- og sykkelvegar i Noreg. I perioden 2006-2015 skal det brukast 3,7 mrd kroner på gang- og sykkelvegar langs eksisterande veger. I tillegg kjem bompengar og utbygging av gang- og sykkelvegar som er ein del av nybygde riksvegstrekningar.

 

Statsminister Jens Stolberg og samferdselsminister Liv Signe Navarsete. Foto: Hans Christian Østrem, Statens vegvesen.