Regjeringa vil neste år leggje sterk vekt på dei utfordringane småsamfunn møter. Mange slike samfunn har nedgang i folketalet og lang avstand til nærmaste senter.

Utfordringane her blir store når det gjeld å sikre velferdstilbod, offentlege og private tenester og sysselsetjing. Sterkare fokus på desse områda er ei direkte oppfølging av stortingsmeldinga om distrikts- og regionalpolitikken.

- Den samla innsatsen overfor småsamfunn skal rette seg mot ulike sektorar og gjennomførast med ulike verkemiddel. Fylkeskommunane som ansvarlege organ for regional utvikling spelar ei sentral rolle i arbeidet med strategiar overfor småsamfunn i samarbeid med dei aktuelle kommunane, seier kommunal- og regionalminister Sylvia Brustad.

Døme på tiltak som skal gjennomførast, er å få etablert offentlege servicekontor, tilrettelegging av ulike typar utdannings- og kompetansetilbod, næringsutvikling og ein spesifikk innsats i høve til kvinner, ungdom og unge i etableringsfasen. I starten blir det ei viktig oppgåve å hauste røynsler frå den fireårige utkantsatsinga, som blir avslutta i år. Departementet arbeider med eit informasjonsopplegg om dette.

Kommunal- og regionaldepartementet vil samordne innsatsen ved å etablere møteplassar og forum for erfaringsoverføring. Til tilrettelegging for næringsutvikling er det sett av 22 millionar kroner som er øyremerkte for prosjekt som er med i småsamfunnssatsinga. Av desse midlane går 15 millionar kroner til fylkeskommunane, som skal prioritere utviklingsprogram og kommunar i høve til kvarandre. Det er førebels ikkje aktuelt å peike ut bestemte kommunar eller område som får pilotstatus, slik det har vore i utkantsatsinga. Dei resterande sju millionar kronene skal gå til gjennomføring av nasjonale tiltak på tvers av fleire sektorar og den nasjonale samordninga av innsatsen.