Betre omsorg for ofra

Etter angrepa 22. juli vil fleire søke om valdsoffererstatning. Difor gjer regjeringa framlegg om å auke løyvingane til behandling av slike søknader med til saman 30 millionar kroner. Samstundes må løyvinga til erstatningsutbetalingane aukast med 185 millionar kroner.

– For regjeringa er det avgjerande at alle valdsofre får den naudsame omsorga, og at rettstryggleiken deira blir teken vare på. Det er viktig at det økonomiske oppgjeret etter 22. juli blir riktig og ordentleg, seier justisminister Knut Storberget.

I dag er mange søknader om valdsoffererstatning til handsaming hos styresmaktene. Det vil i tillegg kome inn fleire søknader som følgje av terrorangrepa 22. juli 2011. Regjeringa meiner difor at det er behov for å auke løyvinga til Kontoret for valdsoffererstatning, som behandlar søknader om valdsoffererstatning, og løyvinga til Statens sivilrettsforvaltning, som er sekretariat for Erstatningsnemnda for valdsofre som behandlar klagesakene.

Regjeringa gjer difor framlegg å auke løyvinga til Kontoret for valdsoffererstatning med 25 millionar kroner, og å auke løyvinga til Statens sivilrettsforvaltning med 5 millionar.

Som følgje av framlegget om auka løyvingar til valdsoffererstatningsmyndighetene forventar regjeringa også at utbetalingane av erstatning til valdsofre vil auke. Difor gjer regjeringa framlegg om å auke løyvinga til utbetalingar med 185 millionar kroner.