Regjeringa deler ut 122 millionar kroner til opplæring på arbeidsplassen

Målgruppa for ordninga er arbeidstakarar med låg formell utdanning. Målet er å styrke dei grunnleggande ferdigheitene til vaksne i lesing, skriving, rekning og digitale ferdigheiter, og dessutan opplæring i norsk eller samisk.

– Vi treng fleire folk og meir kompetanse i arbeidslivet framover. Kompetansepluss er ei svært viktig ordning, som bidrar til å kvalifisere tilsette og ruste dei til å kunne halde fram i jobbane sine. Dette er vinn-vinn for arbeidstakarar, arbeidsgivarar og samfunnet, seier forskings- og høgare utdanningsminister Oddmund Hoel (Sp).

Det er Direktoratet for høgare utdanning og kompetanse (HK-dir) som vurderer søknadene. Dei tok i år imot 598 søknader til Kompetansepluss arbeid og frivilligheit. Totalt vart det søkt om eit beløp på 271 millionar kroner. 

– Dei høge søknadstala viser kor viktig denne ordninga er, både i arbeidslivet og innan frivilligheita. I år ser vi ekstra stor aktivitet i nord, og det er vi særleg glade for, seier Hoel.

Sidan oppstarten av Kompetansepluss arbeid i 2006 har over 100 000 delteke i opplæring på arbeidsplassen. I 2023 fekk mange ukrainske flyktningar opplæring gjennom ordninga.

– Ferdigheiter i språk, rekning og digitale verktøy er avgjerande i arbeidslivet, uavhengig av utdanning og yrke. Kompetansepluss-midlane rettar seg direkte mot slike grunnleggande ferdigheiter, og er derfor eit viktig verkemiddel for å bidra til høg sysselsetting i Noreg, særleg for vaksne, seier Sveinung Skule, direktør i HK-dir.

Ordninga er tredelt

• Kompetansepluss arbeid gir midlar til kurs for arbeidstakarar knytt til arbeidsplassen.
• Kompetansepluss frivilligheit gir midlar til kurs knytt til aktivitetar i frivillige organisasjonar.
• Kompetansepluss fagopplæring gir midlar til kurs som førebuing til fagbrev.

Årets tildeling til Kompetansepluss arbeid og frivilligheit

• 186 prosjekt innan Kompetansepluss arbeid, til saman 84 millionar kroner.
• Av desse går 9 millionar kroner til tiltakssona i Troms og Finnmark, inkludert fire samiske prosjekt.
• 49 prosjekt innan Kompetansepluss frivilligheit, til saman 14,9 millionar kroner.
• Av desse går 1,4 millionar kroner til tiltakssona i Troms og Finnmark.
• I tillegg skal 23 millionar kroner fordelast til Kompetansepluss fagopplæring våren 2024.

• Her kan du sjå kven som har fått pengar i årets tildeling.

Tildelte pengar fordelt på fylke (arbeid og frivilligheit)	Kroner
Agder	7 078 500
Innlandet	2 325 000
Møre og Romsdal	1 392 500
Nordland	6 057 500
Oslo	10 912 500
Rogaland	3 426 000
Troms og Finnmark	17 667 500
Trøndelag	16 776 000
Vestfold og Telemark	13 942 500
Vestland	1 933 500
Viken	17 398 500

23 millionar til Kompetansepluss fagopplæring

Om lag 23 millionar kroner skal fordelast til Kompetansepluss fagopplæring våren 2024. Målgruppa i denne ordninga er vaksne arbeidstakarar med låg formell utdanning, men lang erfaring innan faget sitt. Opplæringa skal styrke grunnlaget til deltakarane for å kunna ta fagbrev som praksiskandidatar. Opplæringa vil bidra til at dei som gjennomfører ho, står sterkare og kan få ei meir varig tilknyting til arbeidslivet.

• Her kan du søke om tilskot