Fiskeri- og kystdepartementet har fastsett totalkvoten for norsk arktisk sei nord for 62. breiddegrad i 2006. Kvoten er 193 500 tonn. Det er ein reduksjon på 10 prosent i høve til totalkvoten for i år.

Ved fastsettinga av kvoten er det lagt til grunn ein forvaltningsstrategi tilsvarande den som var til høyring tidlegare i år. Havforskingsinstituttet har gitt signal om nedgang i bestanden og på den bakgrunn er kvoten redusert med 10 prosent.

Den fastsette totalkvoten for neste år vil ligge noko over det faktiske uttaket av sei i år. Dersom seien neste år er tilgjengeleg på same måte som i år og fiskeinnsatsen er den same, vil kvotereduksjonen i 2006 neppe føre til reelle endringar for fiskarane.

Fiskeridirektoratet har utarbeidd framlegg til ein forvaltningsstrategi for norsk arktisk sei. Strategien har vore til høyring og departementet tar sikte på å vedta ein forvaltningsstrategi for seien i 2006.