800 000 kroner til Varanger Næringssenter

Lokale og regionale parkar over heile landet får no midlar frå Kommunal- og regionaldepartementet  til å satse på bærekraftig bruk av natur- og kulturverdiar i lokal bygdeutvikling. - Me har fått inn mange gode søknadar, og ”Varangerhalvøya - Natur-og kulturpark som samarbeidsmodell er eit av prosjekta som får støtte, seier kommunal- og regionalminister Liv Signe Navarsete. 

Verdiskapingsprogrammet for lokale og regionale parkar skal bidra til å fremje levande bygdesamfunn gjennom heilskapleg stad- og næringsutvikling i område med særskilde natur- og kulturverdiar.

Hovudmålet med prosjektet ”Varangerhalvøya natur- og kulturpark” er å lukkast med etablering av natur- og kulturpark som samarbeidsplattform for dei aktuelle kommunane, Finnmarkeiendommen og Finnmark fylkeskommune. Arbeidet er tenkt i tre fasar: forankring og mobilisering rundt lokale moglegheiter på Varangerhalvøya, parkplan for Varangerhalvøya natur- og kulturpark og plattform for handling.

- Prosjektet byggjer på eit etablert samarbeid om natur og kulturbasert stadutvikling mellom dei involverte partane. Erfaringane frå dette arbeidet vil vere viktig i prosjektet med å skape integrert områdeforvaltning og auka verdiskaping bygd på lokale natur- og kulturressursar på Varangerhalvøya. Eg ser fram til å følgje arbeidet, seier kommunal- og regionalminister Liv Signe Navarsete.    

- Me ynskjer at verdiskapingsprogrammet skal ha overføringsverdi for fleire, og legg også vekt på kommunikasjon og erfaringsutveksling. Dette gjeld både mellom parkar som er godt etablerte, men også for parkar som er under etablering. Me ynskjer at dei parkane som no får støtte kan utvikle seg til å bli ei kjelde til inspirasjon og kunnskap for andre som er interessert i park som modell for bygdeutvikling, seier Navarsete.

Kommunal- og regionaldepartementet sin pressetelefon: 22 24 25 00.