918 500 kroner til Valdres Natur- og kulturpark

Lokale og regionale parkar over heile landet får no midlar frå Kommunal- og regionaldepartementet til å satse på bærekraftig bruk av natur- og kulturverdiar i lokal bygdeutvikling. - Me har fått inn mange gode søknadar, og ”Hytte i Valdres” er eit av prosjekta som får støtte, seier kommunal- og regionalminister Liv Signe Navarsete.

Verdiskapingsprogrammet for lokale og regionale parkar skal bidra til å fremje levande bygdesamfunn gjennom heilskapleg stad- og næringsutvikling i område med særskilde natur- og kulturverdiar.

Prosjektet er eit verdiskapingsprogram basert på hytteturisme i Valdres. Programmet skal optimere verdien av hyttebygging, hytteeigarane si bruk av hytta samt stimulere til nærare samarbeid mellom hytteeigarane og lokalbefolkning og kommunane i Valdres.

Arbeidet blir koordinert og byggjer på verdiane som er utvikla i Valdres Natur- og Kulturpark. Programmet blir drive i eit nettverk med fleire private og offentlege aktørar i Valdres. 

- Det å jobbe nært med hytteeigarane som ressurs og innbyggjar er særleg interessant. Eg trur prosjektet vil få fram ny kunnskap som mange kan lære noko av. Eg gler meg difor til å se hva slags resultat de klarar å få til i dette spanande prosjektet, seier kommunal- og regionalminister Liv Signe Navarsete.

- Me ynskjer at verdiskapingsprogrammet skal ha overføringsverdi for fleire, og legg også vekt på kommunikasjon og erfaringsutveksling. Dette gjeld både for parkar som er godt etablerte, men også for parkar som er under etablering. Me ynskjer at dei parkane som no får støtte kan utvikle seg til å bli ei kjelde til inspirasjon og kunnskap for andre som er interessert i park som modell for bygdeutvikling, seier Navarsete.

Kommunal- og regionaldepartementet sin pressetelefon: 22 24 25 00.