100 millionar kroner til miljøteknologi

Regjeringa foreslår å løyve 100 millionar kroner til miljøteknologi. – Ei forsterka satsing på utvikling og bruk av ny miljøteknologi vil fremje næringsutvikling som i neste omgang vil bidra til å løyse miljøutfordringane, seier nærings- og handelsminister Sylvia Brustad.

Det overordna målet med satsinga er å stimulere til pilot- og demonstrasjons­prosjekt innanfor miljøteknologi. Satsinga skal bidra til å styrkje konkurranseevna til norsk industri, og fremje forretningsutvikling som i neste omgang medverkar til at Noreg når miljømåla sine.

Gjennom satsinga skal Innovasjon Noreg kunne gi stønad til små, mellomstore og store bedrifter i heile landet. Alle tildelingar under ordninga skal vere i tråd med ESA sine statsstønadsreglar.

– Norsk næringsliv har høg kompetanse innanfor miljøteknologi, som for eksempel bioenergi og annan fornybar energi, i tillegg til område som avfallshandtering og miljøovervaking. Regjeringa si satsing på pilot- og demonstrasjonsprosjekt vil  bidra til å skape nye arbeidsplassar, og samtidig bidra til å løyse dagens og framtidas miljøutfordringar, seier statsråd Sylvia Brustad.