Elektronisk kommunikasjon: Ny klagenemnd styrkjer rettane til forbrukarane

- Oppretting av Brukerklagenemnda for elektronisk kommunikasjon er eit viktig gjennombrot når det gjeld rettane til forbrukarane. Den nye brukarklagenemnda gjer at forbrukarane og mindre bedrifter no raskt og billig får avgjort klagene som gjeld elektroniske kommunikasjonstenester.

Dette seier samferdselsminister Liv Signe Navarsete i samband med opninga av Brukerklagenemnda for elektronisk kommunikasjon.

Brukarklagenemnda vil ta for seg klager som gjeld offentlege fastnettelefontenester, mobiltelefontenester og breibandtelefoni, i dei tilfella der tenesta er tilgjengeleg som såkalla "alle-til-alle kommunikasjon". Internettilknyting, det vil seie line med modem, ISDN og breiband er òg innanfor ansvarsområdet til nemnda. Det same gjeld for leveringspliktige tenester, slik som nummeropplysning, telefonkatalog, offentleg betalingstelefon og tilbod til dei som er funksjonshemma.

- Eg vil rose teletilbydarane som har blitt einige om nemndavtalen og ei finansieringsordning som alle kan leve med. Dette viser at telekommunikasjonsbransjen er med på å ta ansvar når det gjeld rettane til kundane, seier samferdselsministeren.

Brukerklagenemnda for elektronisk kommunikasjon er oppretta på initiativ frå Samferdselsdepartementet. Forbrukarrådet har leia styringsgruppa som har hatt ansvaret for å opprette nemnda. I tillegg har styringsgruppa hatt representantar frå Samferdselsdepartementet, Barne- og likestillingsdepartementet og Post- og teletilsynet.


Til redaksjonen
For meir informasjon om Brukerklagenemnda for elektronisk kommunikasjon – ta kontakt med underdirektør Ole Asbjørn Lie, Forbrukerrådet, tlf. 907 64 155

Sjå også pressemeldinger om samme sak frå:

• Post- og teletilsynet: "Ny klagenemnd opprettet: PT fjerner 21 tilbydere fra telepriser.no"
• Forbrukerrådet: "Telekundene får klagemur"