”Finnfast”: Fastlandsamband til Finnøy, utbygging kan ta til i 2006, ferdig i 2009
Historisk arkiv
Publisert under: Regjeringen Stoltenberg II
Utgjevar: Samferdselsdepartementet
Pressemelding
Pressemelding | Dato: 12.01.2006 | Sist oppdatert: 05.10.2006
- ”Finnfast” vil gi folk og næringsliv eit betre samband mellom Rennesøy og Finnøy og fører til at øyane Finnøy og Talgje får eit ferjefritt vegsamband med Rennesøy og vidare til fastlandet, seier samferdselsminister Liv Signe Navarsete. (12.01.06)
Pressemelding
Nr.: 03/06
Dato: 12.01.06
”Finnfast”: Fastlandsamband til Finnøy, utbygging kan ta til i 2006, ferdig i 2009
- ”Finnfast” vil gi folk og næringsliv eit betre samband mellom Rennesøy og Finnøy og fører til at øyane Finnøy og Talgje får eit ferjefritt vegsamband med Rennesøy og vidare til fastlandet. Byggearbeidet kan ta til i 2006 og skal etter planen vere ferdig i 2009.
Dette seier samferdselsminister Liv Signe Navarsete i samband med at regjeringa går inn for utbygging av tunnel- og vegprosjektet ”Fastlandsamband til Finnøy i Rogaland, Finnfast”. Regjeringa vil om kort tid leggje fram eit forslag for Stortinget om utbygging og finansiering av riksveg 519 ”Finnfast” med tilknyting til Talgje.
Prosjektet omfattar bygging av ein 5,7 kilometer lang undersjøisk tunnel mellom Hanasand på Rennesøy og Ladstein på Finnøy. I tillegg kjem ein om lag 1,5 kilometer lang tilknytingsveg i tunnel til Talgje. Utbygginga er eit ferjeavløysingsprosjekt som vil frigi ei ferje som i dag trafikkerer Søndre Finnøy-samband, mellom Hanasand på Rennesøy og Finnøy og Ladstein i Finnøy kommune.
- Utbygginga vil føre til vesentleg kortare reisetid for trafikantar som skal til og frå øyane Finnøy og Talgje. Pendlarane får kortare reisetid, og det blir dermed lagt til rette for ein utvida arbeidsmarknad i området. Det nye vegsambandet vil elles vere med på å minske avstandskostnadene og –ulempene for næringslivet i området, seier samferdselsminister Liv Signe Navarsete.
Utbygginga av Finnfast-prosjektet kan etter planen ta til sommaren eller hausten 2006, med sikte på at det nye vegsambandet kan opnast for trafikk i 2009. Byggjekostnadene for prosjektet er 530 millionar 2006-kroner. Når ein tar med finansieringskostnadene, blir dei samla kostnadene 747 millionar kroner 2006-kroner. Finansieringa av Finnfast-prosjektet skal etter planen skje ved bompengar, statlege løyvingar over budsjettet for riksveginvesteringar og ved hjelp av midlar frå ordninga med alternativ bruk av ferjetilskot. Bruken av midlar frå denne ordninga har mellom anna samanheng med innsparing av statlege ferjetilskot ved at ferjesambandet Hanasand - Talgje - Ladstein blir lagt ned som følgje av utbygginga av Finnfast-prosjektet.
