Opning av Brukerklagenemnda for elektronisk kommunikasjon

Statssekretær Steinulf Tungesvik
Forbrukerhuset, Oslo, 27. januar 2006

Takk for at eg fekk høve til å kome hit i dag og vere med på opninga av den nye Brukerklagenemnda for elektronisk kommunikasjon.

Opprettinga av den nye Brukerklagenemnda vil forbetre rettane til forbrukarane vesentleg på området for elektronisk kommunikasjon.

Brukerklagenemnda blir oppretta frå 1. februar i år og tek over for den gamle Teleklagenemnda, som blei lagd ned 1. november 2005. Det har teke noko tid å få den nye nemnda på plass, men eg trur det har vore nødvendig at vi har brukt tid på førebuingar og planlegging for å få til ein nemndsavtale som alle tilbydarane kan leve med.

Først vil eg gjerne seie litt om kva Brukerklagenemnda er - og kva ho ikkje er. Brukerklagenemnda er organisert som ei uavhengig bransjenemnd, etter modell av andre bransjenemnder, som til dømes bankklagenemnda. Brukerklagenemnda er dermed ikkje eit forvaltningsorgan, og avgjerdene til nemnda er berre rådgivande. Eg vil òg presisere at den som klagar, først skal klage til tilbydaren sin. Dersom dei ikkje klarer å bli einige, kan forbrukaren klage til Brukerklagenemnda.

Opninga av Brukerklagenemnda er eit viktig gjennombrot når det gjeld forbrukarrettar innan elektronisk kommunikasjon. Dette er ein sektor der det ikkje alltid er nok samarbeid. Det har vore uoversiktleg for forbrukarane med mange ulike aktørar og nokre useriøse aktørar. Ekomsektoren har heller ikkje hatt nokon felles bransjeorganisasjon.

Brukerklagenemnda vil vere med på å rydde opp og disiplinere bransjen. Samtidig får mange fleire forbrukarar no ei klageordning, enn det som var tilfelle med den gamle Teleklagenemnda. Brukerklagenemnda vil no gjelde både for fasttelefon, mobiltelefon og Internettilgang.

Opprettinga av Brukerklagenemnda inneber ei stor utviding samanlikna med Teleklagenemnda - både når det gjeld kven og kva ein kan klaga på. Ein forbrukar kan no klage på aktører som tilbyr ei teneste som blir omfatta av Brukerklagenemnda sin kompetanse - ikkje berre på Telenor, Tele2 og Netcom.

Både privatpersonar og mindre bedrifter har rett til å klage. Dette er dei som vanlegvis blir omfatta av forbrukaromgrepet og som truleg har størst behov for ei klageordning. Tilbydarar kan ikkje klage til Brukerklagenemnda. Slike klager skal framleis gå til Post- og teletilsynet.

Eg vil gjerne seie litt meir om kva tenester som blir omfatta av kompetansen til nemnda. På eit område som ekomsektoren, som er i stadig endring, er det ikkje lett å gjere absolutte avgrensingar. Eg trur derfor det er viktig at nemnda får stå noko fritt til å gjere sine eigne tolkingar etter kvart som nemnda kjem i gang og i lys av utviklinga på området for elektronisk kommunikasjon.

Det vi allereie i dag kan slå fast er at offentleg fastnett telefonteneste og offentleg mobiltelefonteneste blir omfatta av den nye Brukerklagenemnda. Breibandstelefoni blir omfatta såframt det blir regulert som offentleg telefonteneste, det vil seie at tenesta er tilgjengeleg for alle-til-alle kommunikasjon.

Alle former for Internettilknyting blir også omfatta – det vil seia analog linje med modem, ISDN og breiband. I tillegg skal nemnda behandle klager på dei leveringspliktige tenestene. Dette gjeld tenester som nummeropplysning, telefonkatalog, offentleg betalingstelefon og ytingar til funksjonshemma. Den gamle Teleklagenemda behandla berre rekningsklager på fasttelefon. Rekningsklager vil truleg framleis utgjere ein stor del av Brukerklagenemnda sine saker

Eg håper at dei fleste saker kan løysast mellom forbrukar og tilbydar før dei går til nemnda. Samtidig håper eg at informasjon om Brukerklagernemda når ut til folk.

Det er mange som har vore involvert i prosessen med få starta opp Brukerklagenemnda, og eg vil gjerne takke Forbrukerrådet, som har leia ”prosjekt Brukerklagernemda for elektronisk kommunikasjon” frå byrjinga av 2005. For oss i Samferdselsdepartementet har det vore svært viktig å trekkje vekslar på den kompetansen Forbrukerrådet har opparbeidd seg når det gjeld oppretting av andre liknande klagenemnder.

Post- og teletilsynet fortener også ein spesiell takk for den innsatsen dei har gjort i styringsgruppa til prosjektet.

Eg vil og gjerne rose tilbydarane for at dei i nemndsavtala har klart å bli einige om ei finansieringsordning som alle kan leve med. Med dette gir tilbydarane eit signal om at dei meiner det er viktig å ha ei klageordning for kundane sine og er opptekne av å yte god kundeservice.

Då står det berre att for meg å seie lukke til med oppstarten av den nye Forbukerklagenemnda for elektronisk kommunikasjon.