Fiskeriministeren møtte Japans gjenoppbyggingsminister

Den japanske gjenoppbyggingsministeren Takumi Nemeto, møtte fiskeriminister Elisabeth Aspaker 9. mai for politiske samtalar.

Japan har i mange tiår vore ein viktig marknad for norsk sjømat. Etableringa av Prosjekt Japan i 1985 var starten på eit ”sushieventyr” for norsk laks. Japanske sushivanar har seinare skapt ein populær mattrend i Europa.

I samband med gjenoppbygginga etter tsunamikatastrofen i 2011 ønskjer japanarane å lytte til norske erfaringar med fiskeriforvaltning, strukturen i fiskeflåten og måten norsk fiskerinæring er bygd opp på. Den japanske delegasjonen var i Ålesund 8. mai der dei såg nærare på samarbeid innan den marine sektoren. Dei besøkte mellom anna oppdrettselskapet Marine Harvest og Havfisk sitt nye fiskefartøy ”Gadus Neptun”.

- Norsk kompetanse til å forvalte dei marine ressursane og produsere sunn sjømat er av våre viktigaste bidrag til internasjonal matproduksjon. For sjømatnasjonen Noreg er det viktig å kunne utveksle erfaringar med Japan, seier fiskeriminister Elisabeth Aspaker.

- Det var viktig for meg å bruke dette høvet til å understreke verdien av betre marknadstilgang for norsk sjømat i den japanske marknaden, seier fiskeriminister Elisabeth Aspaker.