Regjeringa gir pengar til 1130 nye studentbustader

– Å sørge for at det finst god tilgang på trygge og rimelege bustader for studentar over heile landet, er noko av det viktigaste vi kan gjere for studentøkonomien. For dei fleste studentar er husleige den største enkeltutgifta. I år aukar vi innsatsen særleg i Nord-Noreg, men også studentbustadprosjekt i sør, aust og vest får store tilskot denne gongen, seier forskings- og høgare utdanningsminister Ola Borten Moe.

Sjå kva studentsamskipnader som får tilskot i denne runden nedst i saka.

Satsar på bygging av studentbustadar i Nord-Noreg

I år er det i Nordland og Troms og Finnmark som har fått pengar til dei største prosjekta. Det prosjektet som får høgast tilskot ligg i Tromsø, der får Noreg arktiske studentsamskipnad 76 millionar kroner til 200 nye hybeleiningar. Studentinord i Bodø får 68 millionar kroner til 178 nye studenthyblar i Skavdalslia.

– Vi vil ha eit aktivt og levande studentliv i Nord-Noreg, og vi veit det er stort behov for fleire studentbustader nord i landet no. Derfor har vi sett av pengar til å skalere opp tilbodet av studentbustader i Bodø og Tromsø kraftig, seier Borten Moe.

Blant andre store byggeprosjekt er eit nybygg med 120 studenthyblar i Elverum, og rehabilitering av 120 hyblar på Sogn studentby i Oslo.

 Vil få opp tempoet på bygginga etter pandemien

15 byggeprosjekt, fordelt på åtte studentsamskipnader, får pengar. Samskipnadane søkte om tilskot til 1664 hybeleiningar. Regjeringa har valt å prioritere nye og lovande byggeprosjekt som kan startast opp i løpet av kort tid. Dermed er det 1130 hybeleiningar som får pengar i år.

– Vi vil få opp tempoet på bygginga av studentbustader og på sikt er målet 3000 nye hyblar i året. Eg veit at pandemien har ført til høgare byggekostnadar, men synest studentsamskipnadene har vore gode til å planlegge nye prosjekt dei kan sette i gang raskt. Det betyr at det ikkje er lenge til dei første spadane kan stikkast i jorda. Så skal vi sjå på korleis vi kan bidra til å få opp talet på søknadar, seier Borten Moe.

Slik blir midlane til dei 1130 hybeleiningane fordelte:

Samskipnad	Studiestad	Prosjekt	Tiltak	Tal på hybeleiningar	Tilskot i kr
SINN	Elverum	Meierigata	Nybygg	120	39 144 000
SSN	Rauland	Raulandsakademiet	Nybygg	32	10 438 400
SiO	Oslo	Jon P Erliens v 1B-13 (verneverdig)	Rehab.	171	65 356 200
Sammen	Bergen	Fantoft - N-blokk syd	Nybygg	2	764 400
SiT	Trondheim	Magnus den Godes ft 2	Nybygg	2	764 400
SiA	Kristiansand	Gimle 4	Nybygg	71	27 136 200
SiA	Grimstad	Jon Lilletunsvei 21 og 23	Nybygg	6	1 957 200
Sammen	Stord	Rommetveit - Osahaugen 22-26	Nybygg	82	26 748 400
Sammen	Bergen	St.Halvardsvei 11	Nybygg	77	29 429 400
SiT	Gjøvik	Røverdalen	Nybygg	20	6 524 000
SiT	Gjøvik	Studievegen	Nybygg	70	22 834 000
SiO	Oslo	Kringsjå Fase 3	Nybygg	79	30 193 800
SiA	Kristiansand	St. Olavsvei 41-43	Nybygg	20	7 644 000
NAS	Tromsø	Dramsveien panorama, tr 4	Nybygg	200	76 440 000
Studentinord	Bodø	Skavdalslia	Nybygg	178	68 031 600
				1 130	413 406 000