Åslaug Haga støttar utviklingsarbeid rundt kulturminne i Vik
Historisk arkiv
Publisert under: Regjeringen Stoltenberg II
Utgjevar: Kommunal- og regionaldepartementet
Pressemelding | Dato: 02.09.2007
Kommunal- og regionaldepartementet løyver til saman 3,1 millionar kroner til utviklingsarbeid rundt kulturminne, kulturarv og kulturlandskap i Vik kommune i Sogn og Fjordane.
Kommunal- og regionaldepartementet (KRD) løyver til saman 3,1 millionar kroner til utviklingsarbeid rundt kulturminne, kulturarv og kulturlandskap i Vik kommune i Sogn og Fjordane.
- Regjeringa ønskjer å legge til rette for at folk skal ha reell fridom til å velje kvar dei vil bu. For å utvikle attraktive stader og fleire arbeidsplassar i distrikta, er det viktig at kommunar med spesielle føremoner klarar å utnytta potensialet som ligg i kulturhistoriske verdiar og kulturlandskap. Det gjeld både å få til verdiskaping og utvikling av meir attraktive stader for fastbuande og turistar. Her har prosjektet i Vik overføringsverdi til andre kommunar, seier kommunal- og regionalminister Åslaug Haga.
Å utnytta Vik kommune sine mange kulturminne og kulturlandskapet i kommunen til omstilling og utvikling av næringslivet er hovudmålet i eit prosjekt som Vik no får støtte til hjå Kommunal- og regionaldepartementet. Støtta er eit ledd i den nasjonale småsamfunnssatsinga. Det er sett av i alt 50 millionar kroner til den nasjonale småsamfunnssatsinga i 2007.
I Vik kommune ligg verdifulle kulturminne som Hopperstad stavkyrkje og mellomalderkyrkja på Hove. Kulturlandskapet i kommunen representerer også verdiar, blant anna gjennom den verna Vikøyri, som er eitt av dei få attverande elementa frå det kyst- og fjordnære landbruket si husmannshistorie.
I prosjektet inngår fleire delprosjekt. Stadutvikling på Vikøyri, eit utviklingsarbeid av kulturhistorisk visnings- og opplevingssenter, utvikling av ”Sverremarsjen – ei alternativ pilegrimsreise i ein rebell sine fotspor” og tiltak i og langs elvane Hopra og Vika er blant delprosjekta som no får støtte frå KRD.
Kommunal- og regionaldepartementet sin pressetelefon: 22 24 25 00.