Målet med Kompetanseløft 2025 er å bidra til fagleg sterke tenester og sikre at den kommunale helse- og omsorgstenesta og den fylkeskommunale tannhelsetenesta har tilstrekkeleg og kompetent bemanning.

Fire strategiske område

Gode helse- og omsorgstenester blir skapte i møtet mellom pasient, brukar og personell. Det krev høg fagleg kompetanse, breidde i tenestene, god kontinuitet i bemanninga, og fleire heile og faste stillingar.

Kompetanseløft 2025 er bygd opp rundt fire strategiske område:

  • rekruttere, halde på og utvikle personell
  • brukarmedverknad, tenesteutvikling og tverrfagleg samarbeid
  • kommunal sektor som forskingsaktør, fagutviklings- og opplæringsarena
  • leiing, samhandling og planlegging.

Tiltaka blir løpande vurderte og vidareutvikla. Gjennom årsrapportar, statistikk og analyser gir Kompetanseløft 2025 eit viktig kunnskapsgrunnlag om utviklingstrekk innan personell og kompetanse i tenestene.

Oppfølging og tiltak

Regjeringa si opptrappingsplan for heiltid og god bemanning i omsorgstenesta blir følgd opp gjennom Kompetanseløft 2025.

I statsbudsjettet for 2026 blei det varsla ei omlegging av tilskotsordningane i Kompetanseløft 2025. Målet er mellom anna å støtte opp under ein ny helsepersonellplan og hjelpe kommunane med personellutfordringane dei står i.

Veletablerte ordningar med høg måloppnåing skal vurderast for vidareføring. Tiltaka i opptrappingsplanen for heiltid og god bemanning og Kompetanseløft 2025 blir førte vidare inntil ein ny plan ligg føre.