Revidert nasjonalbudsjett 2009
518 millionar kroner til statleg kjøp av posttenester
Historisk arkiv
Publisert under: Regjeringen Stoltenberg II
Utgiver: Samferdselsdepartementet
Pressemelding | Nr: 65/09 | Dato: 15.05.2009
Regjeringa gjer framlegg om at det over statsbudsjettet for 2009 skal løyvast 518 millionar kroner til statleg kjøp av post- og banktenester frå Posten Norge AS. - Dette gjer vi for å sikre at vi framleis skal ha eit godt tenestetilbod i heile landet, trass finanskrisa, seier samferdselsminister Liv Signe Navarsete.
I budsjettet for 2009 blei det ikkje løyvd midlar til statleg kjøp av bedriftsøkonomisk ulønsame post- og banktenester staten har pålagt Posten. No føreslår regjeringa i revidert nasjonalbudsjett 518 millionar kroner til kjøp av slike tenester.
- Då budsjettet vart lagt fram i haust, tyda alle prognosar på at inntektene frå den samla verksemda i Posten også i år kunne dekkje opp kostnadene for desse. No ser verda heilt annleis ut. Det blir sendt langt mindre brev, reklame og pakkar enn tidlegare, og det påverkar sjølvsagt økonomien i Posten. Det er viktig for oss å bidra til at folk og næringsliv skal ha tilgang til gode og likeverdige posttenester også i framtida, og difor går vi no likevel inn og kjøper tenester, seier samferdselsminister Navarsete.
- For fleire opplysningar: St.prp. nr. 67 (2008-2009) Tilleggsbevilgninger og omprioriteringer i statsbudsjettet 2009 (foreløpig utgave, PDF)