Rapport om økonomiske misleghaldssaker osb. i fjerde kvartal 2023
Rapport | Dato: 12.02.2024 | Utanriksdepartementet
I fjerde kvartal 2023 registrerte Sentral kontrolleining 37 nye saker. Sakene var i hovudsak knytte til mistanke om økonomisk misleghald, medan tre var relaterte til mistanke om seksuell utnytting, misbruk og trakassering i samband med tilskotsforvaltinga (SEAH-saker).
I den same perioden vart 23 saker avslutta, blant desse var tre SEAH-saker. Alle tala om økonomiske misleghaldssaker omfattar også saker under Norad og Norec sine ansvarsområde.
Oversikta nedanfor viser dei ti sakene der det var grunnlag for reaksjon, og som vart avslutta i fjerde kvartal 2023. Det er betalt tilbake til saman 4 837 912 kroner. I tillegg er til saman 3 993 770 kroner betalte tilbake til prosjekt, noko som inneber at avtalepartnar dekkjer tapet ved å skyta inn eigne midlar.
Oversikta blir utarbeidd som oppfølging av nulltoleransen til regjeringa for økonomisk misleghald og blir ajourført kvart kvartal. For fleire opplysningar blir det vist til Sentral kontrolleining i Utanriksdepartementet, Internrevisjonen i Norad eller til Norec.
|
Saksnr./ ansvar |
Land/region |
Avtalepartnar |
Kort omtale av saka |
|
1206 Norad |
Nigeria |
Mari Stopes International |
Ein tilsett hos lokal partnar underslo midlar ved bruk av falske mottakarar. NOK 6 334 er betalte tilbake til Norad.
|
|
1419 Norad |
Somalia |
Kirkens Nødhjelp |
Hos ein av dei lokale partnarane til Kirkens Nødhjelp vart det avdekt at alle midlane som var overførte i perioden frå 2014 til 2021 anten har vorte underslått eller ikkje kan gjerast greia for. NOK 4 675 482 er betalte tilbake til Norad.
|
|
1453 Norad |
Niger |
Redd Barna |
Fiktive kvitteringar for kjøp av drivstoff og overnattingskostnader hos lokal partnar. NOK 675 er betalte tilbake til Norad.
|
|
1472 Norad |
Sør-Sudan |
Norsk Folkehjelp |
Manglande utbetalingar til mottakarar frå lokal partnar. NOK 15 524 er betalte tilbake til Norad.
|
|
1511 UD |
Malawi |
Ministry of Health - Joint Sector Health Fund |
Fleirgivarfondet Joint Sector Health Fund vart utsett for nettsvindel kor kriminelle gav seg ut for å vera rette mottakarar av betaling til ein leverandør. NOK 3 745 000 er betalte tilbake til prosjektet.
|
|
1525 Norad |
Kongo Brazzaville |
Digni/Misjonskirken i Norge
|
Ein tilsett hos lokal partnar underslo lønsmidlar. NOK 1 652 er betalte tilbake til Norad.
|
|
1549 Norad |
Bangladesh |
Digni/Frelsesarmeen |
Brot på innkjøpsregelverk og oppblåste prisar hos lokal partnar. NOK 58 393 er betalte tilbake til Norad.
|
|
1562 Norad |
Malawi |
SOS Barnebyer |
Ein tilsett hos lokal partnar underslo midlar og stal eigedelar. NOK 2 724 er betalte tilbake til Norad.
|
|
1572 Norad |
Mosambik |
Landsorganisasjonen i Norge (LO) |
Manglande dokumentasjon av utgifter og brot på innkjøpsregelverk hos lokal partnar. NOK 248 770 er betalte tilbake til prosjektet.
|
|
1575 Norad |
DR Kongo |
CARE Norge |
Dokumentforfalsking og overfakturering hos lokal partnar. NOK 77 128 er betalte tilbake til Norad.
|