2 Tidligare politisk behandling
Spørsmålet om xenotransplantasjon har tidligare vore behandla i ei rekke Stortingsdokument, mellom anna Ot.prp. nr. 49 (2003-2004) Om lov om endring i lov 9. februar 1973 nr. 6 om transplantasjon, sykehusobduksjon og avgivelse av lik m.m.
I denne odelstingsproposisjonen gjorde Helsedepartementet greie for tidligare Stortingsbehandling knytt til xenotransplantasjon. Departementet gjorde vidare greie for forslaget i NOU 2001: 18 Xenotransplantasjon, rettstilstanden nasjonalt og internasjonalt, mellom anna Europarådets retningslinjer for xenotransplantasjon, samt den faglege utviklinga på feltet. Helse- og omsorgsdepartementet syner til proposisjonen når det gjeld dette.
Etter slik gjennomgang som nemnt i Ot.prp. nr. 49 (2003-2004), foreslo departementet at det dåverande mellombels forbodet mot xenotransplantasjon som gjaldt til 1. januar 2005, blei forlengd med tre år fram til 1. januar 2008. Departementet synte til at dette ville gje nok tid til å utarbeide eit forsvarleg forslag til permanent regulering. Vidare synte departementet til at ei slik forlenging ville gje tid til å gjennomføre ein offentleg debatt omkring xenotransplantasjon, og tid til å gjennomføre ei brei alminneleg høyring knytt til eit lovutkast. Departementet uttalte vidare at dersom det før 1. januar 2008 skulle verta sett i gang klinisk utprøving eller utvikla behandlingsformer i utlandet som også norske pasientar ville ønskje å ta del i eller dra nytte av, ville departementet vurdere behovet for å gjere særskilde unntak frå det mellombels forbodet.
Departementet synte deretter til at det i arbeidet med regelverk ville vere viktig å ha nødvendig ekspertise å spele på, mellom anna for å innhente faglege råd, å få informasjon om kva som skjer på fagfeltet, og å få faglege innspel som er nødvendige for å utarbeide eit regelverk på feltet. Departementet synte til at det av desse grunner allereie hadde oppretta eit interimsorgan for xenotransplantasjon og at departementet så det slik at dette interimsorganet framleis ville vere eit viktig ekspertorgan for departementet i den vidare reguleringsprosessen. Departementet uttalte derfor at ein ønskte å vidareføre denne ordninga fram til det var utarbeidd permanent lovregulering av feltet.
I Innst. O. nr. 85 (2003-2004) uttalte sosialkomiteens fleirtal beståande av medlemmane frå Arbeidarpartiet, Framstegspartiet, Sosialistisk Venstreparti og Senterpartiet, at dei så:
«behov for et norsk lovverk som bestemmer framtidige premisser for bruk av biologisk materiale fra dyr til medisinsk behandling av mennesker. Flertallet mener at det bør være mulig å utarbeide en egen norsk lovgivning på området innen en tidsramme av to og et halvt år, og at dagens lovforbud mot xenotransplantasjon som en konsekvens av dette forlenges fram til 1. januar 2007.
Flertallet vil påpeke at et framtidig lovverk må være basert på føre var-prinsippet. Et slikt prinsipp må særlig basere seg på at bruk av biologisk materiale fra dyr kan medføre smitterisiko for mennesker ved en donasjon, og der smitterisikoen ikke bare kan sette mottakers liv i fare, men også kan innebære fare for smittespredning til den øvrige delen av befolkningen.
Flertallet mener at det gjennom kliniske forsøk må være sikret at slik smitterisiko er kartlagt før forbudet mot xenotransplantasjon oppheves eller dispensasjon gis.
Flertallet vil påpeke at xenotransplantasjon også har et dyrevernaspekt som nødvendiggjør en lovgivning som ivaretar dyrehelsen, og som ikke utsetter forsøksdyr for unødige lidelser. Flertallet forutsetter at en ny lovgivning på området også ivaretar dette perspektivet.»
Fleirtalet fremma i samsvar med dette forslag om å forlenge det mellombels forbodet mot xenotransplantasjon til 1. januar 2007. Fleirtalet fremma vidare forslag til følgjande anmodingsvedtak:
«Stortinget ber Regjeringen om å utarbeide ny lov om xenotransplantasjon, basert på Europarådets retningslinjer av 19. juni 2003, ut fra målsetningen om at loven skal tre i kraft fra 1. januar 2007.»
I samsvar med fleirtalsforslaget vedtok Stortinget å forlenge det mellombels forbodet mot xenotransplantasjon fram til 1. januar 2007.