2 Orienteringssak til Stortinget

Kystverket er ansvarleg for fire trafikksentralar der driftskostnadene finansierast gjennom sikkerhetsgebyr. Dette gjeld trafikksentralen i Horten som dekkjer innsegling i Oslofjorden, trafikksentralen i Brevik som dekkjer Grenlandsområdet, trafikksentralen på Kvitsøy som dekkjer Rogaland og delar av Hordaland, samt trafikksentralen på Fedje som dekkjer innsegling til oljeterminalane på Sture og Mongstad. I tilegg kjem trafikksentralen i Vardø som dekkjer skipstrafikken langs norskekysten frå grensa mot Nordvest-Russland til Røst. For trafikksentralen i Vardø dekkjast driftskostnadene gjennom statleg løyving, da trafikksentralen i hovudsak dekkjer fartøy i gjennomgåande fart utan anløp i Noreg.

Kystverket har frå tidligere år opparbeidd ei underdekning knytt til drift av trafikksentralane, som skulle ha vore dekt innan utgangen av 2007, i tråd med tidlegare orientering til Stortinget, jf. St.prp. nr. 1 (2005-2006). Det har vist seg at trafikkutviklinga har vore dårlegare enn det som tidlegare har blitt lagt til grunn. Konsekvensen av dette er at den opparbeidde underdekninga ikkje kan dekkjast inn innan utgangen av 2007. Det leggjast opp til at resterande underdekning på 5,5 mill. kroner skal dekkjast inn i 2008 gjennom gebyrauke.