2 Bakgrunnen for lovframlegget

I samband med omdanninga av forvaltningsbedrifta Televerket til statsaksjeselskap frå 01.11.1994, jf St prp nr 43 (1993-94) og Innst S nr 163 (1993-94) blei det vedteke to lover:

• Lov 24 juni 1994 nr 45 om omdanning av forvaltningsbedrifta Televerket til aksjeselskap (Innst O nr 58 jf Ot prp nr 61 (1993-94))

• Lov 24 juni 1994 nr 44 om at tilsette i Televerket mellombels skal behalde visse rettar etter lov av 4 mars 1983 nr 3 om statens tjenestemenn ved overgang til selskap utskild frå Televerket (Innst O nr 57 jf Ot prp nr 74 (1993-94))

Lova om omdanning av forvaltningsbedrifta Televerket til aksjeselskap har som føremål å regulere tilhøvet til aksjelovgivinga (§ 2), eigartilhøvet til aksjane (§ 3), spørsmål om overføring av private og offentlege rettstilhøve til aksjeselskapet (§§ 4 og 5) og ymse personalspørsmål særleg knytta til mellombels førerett til anna statsstilling og overgang til den statlege ordninga med venteløn (§ 6). Omdanningslova kan seiast å vere av mellombels karakter fordi ho inneheld føresegner knytta til ei hending som gikk føre seg då lova tok til å gjelde. Likevel vil nokre av føresegnene framleis kunne få verknad. Dette vil særleg gjelde § 4 første ledd om vidareføring ved omdanninga utan individuell sakshandsaming av offentlege rettar, konsesjonar, løyve mv. som gjaldt for forvaltningsbedrifta Televerket og § 5 om overføringa av privatrettslege skyldnader frå forvaltningsbedrifta Televerket til aksjeselskapet med fritakande verknad for staten. Etter Samferdselsdepartementet sitt syn vil det kunne skapas nokon grad av tvil om vidareføringa av offentlege rettar mv. og om ansvaret for skyldnader dersom desse føresegnene blir opphevd.

Lova om at tilsette i Televerket mellombels skal behalde visse rettar regulerer det same personalspørsmålet som omhandla i § 6 i omdanningslova for dei tidlegare tilsette i Televerket, som før etableringa av aksjeselskapet blei overført til sjølvstendige aksjeselskaper utskild frå Televerket. Bakgrunnen for lova var krav om lovheimel for at dei aktuelle tilsette som etter overgangen ikkje lengre var offentlege tenestemenn skulle bli sikra visse rettar som fastsett av Stortinget i samband med handsaminga av St meld nr 67 (1991-92) om omorganisering av Televerket, jf Innst S nr 25 (1991-92).