2 Endringsforslag
Kap. 800 Barne- og familiedepartementet
Post 21 Spesielle driftsutgifter
Løyvinga på posten skal mellom anna dekkje utgifter til utgreiingsprosjekt i departementet og andre tiltak innanfor ansvarsområda til departementet. BFD føreslår å redusere løyvinga på posten med 148 000 kroner, mot tilsvarande auke på kap. 325, post 21 under Kulturdepartementet, som følgje av endringa i departementsstrukturen som tok til å gjelde frå mai 2019, jf. Prop. 57 S (2018–2019) og Innst. 236 S (2018–2019).
Kap. 841 Samliv og konfliktløysing
Post 23 Refusjon av utgifter til DNA-analysar, overslagsløyving
Prognosen for talet på DNA-analysar til fastsetjing av farskap er lågare enn lagt til grunn i gjeldande budsjett. BFD føreslår derfor å redusere løyvinga under kap. 841, post 23 med 1,1 mill. kroner.
Kap. 843 Adopsjonsstønad
Post 70 Tilskot til foreldre som adopterer barn frå utlandet, overslagsløyving
Prognosen for talet på utanlandsadopsjonar er lågare enn lagt til grunn i gjeldande budsjett. BFD føreslår derfor å redusere løyvinga under kap. 843, post 70 med 0,9 mill. kroner.
Kap. 845 Barnetrygd
Post 70 Tilskot, overslagsløyving
Utbetalingane til barnetrygd har til no i år vore noko lågare enn tidlegare lagt til grunn. Utgiftene i 2019 blir no rekna til 15 750 mill. kroner. BFD føreslår derfor å redusere løyvinga under kap. 845, post 70 med 40 mill. kroner.
Kap. 854 Tiltak i barne- og ungdomsvernet
Post 21 Spesielle driftsutgifter, kan nyttast under post 71
Det er sett av 15 mill. kroner på posten til eit prøveprosjekt med hurtigbusetjing av einslege, mindreårige asylsøkjarar. Prosjektet er forseinka og berre ein liten del av løyvinga blir nytta i 2019. BFD føreslår å redusere løyvinga under kap. 854, post 21 med 14,6 mill. kroner.
Post 22 Barnesakkunnig kommisjon
Det har komme inn færre rapportar til Barnesakkunnig kommisjon i 2019 enn tidlegare lagt til grunn. BFD føreslår derfor å redusere løyvinga på kap. 854, post 22 med 1 mill. kroner.
Post 45 Større utstyrsanskaffingar og vedlikehald, kan overførast
Løyvinga på posten blir nytta til Bufdir sitt arbeid med digitaliseringstiltak. Midlane skal mellom anna nyttast til kjøp av tenester frå eksterne til systemutvikling i samband med prosjektet DigiBarnevern.
Delar av utviklingsoppgåvene i DigiBarnevern blir óg løyst av interne ressursar i Bufdir. For å sikre korrekt postbruk, føreslår BFD å redusere kap. 854, post 45 med 6,2 mill. kroner, mot ein tilsvarande auke på kap. 858, post 01.
Kap. 3855 Statleg forvalting av barnevernet
Post 60 Kommunale eigendelar
Løyvinga på posten dekkjer inntekter frå kommunale eigendelar for tiltak i det statlege barnevernet. Aktivitetsveksten i det statlege barnevernet har i 2019 vore lågare enn tidlegare lagt til grunn. Eit lågare tal på opphaldsdagar gir reduserte inntekter.
BFD føreslår å redusere kap. 3855, post 60 med 47 mill. kroner.
Kap. 856 Barnevernets omsorgssenter for einslege, mindreårige asylsøkjarar
Post 01 Driftsutgifter
Løyvinga dekkjer utgifter til drift av statlege omsorgssenter for einslege, mindreårige asylsøkjarar under 15 år og forvaltingsoppgåver knytte til omsorgssentera. Det blei sett i gang ein prosess med å redusere talet på plassar i omsorgssentera til 50 plassar i 2018. Utgifter til omstillinga i 2019 er lågare enn tidlegare lagt til grunn.
BFD føreslår å redusere kap. 856, post 01 med 4 mill. kroner.
Kap. 3856 Barnevernets omsorgssenter for einslege, mindreårige asylsøkjarar
Post 04 Refusjon av ODA-godkjende utgifter
Innanlandske utgifter knytte til mottak av asylsøkjarar og flyktningar kan, ifølgje statistikkdirektivet til OECD/DAC, godkjennast som offisiell utviklingshjelp. Ifølgje retningslinjene frå OECD/DAC er det berre utgifter det fyrste året som kan godkjennast. Det er i gjeldande budsjett lagt til grunn at 100 prosent av barna i omsorgssentera har butid under eitt år i 2019. Oppdatert informasjon viser at denne delen er no på 96 prosent.
BFD føreslår å redusere kap. 3856, post 04 med 4,4 mill. kroner.
Kap. 858 Barne-, ungdoms- og familiedirektoratet
Post 01 Driftsutgifter, kan nyttast under kap. 855, post 01
Løyvinga dekkjer lønn og andre driftsutgifter i Bufdir. Grunna auka bruk av interne ressursar i Bufdir i samband med prosjektet DigiBarnevern, føreslår BFD å auke posten med 6,2 mill. kroner mot ein tilsvarande reduksjon på kap. 854, post 45. Sjå òg omtale under kap. 854, post 45.
Kap. 880 Den norske kyrkja
Post 70 Rammetilskot til Den norske kyrkja
Då Den norske kyrkja vart etablert som eige rettssubjekt 1. januar 2017, blei det fastsett ein opningsbalanse med fiktive pensjonsmiddel på 1,7 mrd. kroner som svara til dei framtidige pensjonsforpliktingane. Avkastninga på kyrkja sine pensjonsmiddel har ikkje vore så høg som Statens pensjonskasse sitt krav til renteavkastning. Dette avviket må kyrkja dekkje gjennom solvenspremien.
I utgangspunktet bør Den norske kyrkja sjølv dekkje utgiftene til solvenspremien. BFD føreslår likevel at staten medverkar til å dekkje desse utgiftene for 2017–2019, på bakgrunn av tidspunktet for etablering av rettssubjektet og den korte levetida til rettssubjektet. Frå og med statsbudsjettet for 2020 må Den norske kyrkja sjølv dekkje eventuell solvenspremie til SPK.
På denne bakgrunn føreslår BFD å auke løyvinga på kap. 880, post 70 med 70 mill. kroner i 2019.
Kap. 882 Kyrkjebygg og gravplassar
Post 61 Tilskot til fredete og verneverdige kyrkjebygg, kan overførast
I tråd med Innst. 14 S (2018–2019) blei det løyvt 20 mill. kroner på dåverande kap. 342 Kirkebygg og gravplasser, post 70 Tilskudd til sentrale tiltak for kirkebygg og gravplasser. 10 mill. kroner skulle nyttast til «klimasikring av utsatte og verneverdige kirkebygg» og 10 mill. kroner til «prosjektmidler for å utvikle bevaringsprogram for steinkirkene». Etter endringar i departementsstrukturen er midlane no plasserte på kap. 882, post 70.
Det er i høg grad kommunane som vil motta tilskotet til sikring av kyrkjebygg, jf. omtalen nedanfor under post 70. Dette er ein følgje av kommunane sitt lovfesta økonomiske ansvar for kyrkjene. For å sikre korrekt postbruk føreslår BFD å auke løyvinga på kap. 882, post 61 med 13,8 mill. kroner mot ein tilsvarande reduksjon på kap. 882, post 70, jf. omtale under post 70.
Post 70 Tilskot til sentrale tiltak for kyrkjebygg og gravplassar
Under kap. 882, er det for 2019 løyvd i alt 40 mill. kroner til istandsetting og sikring av freda og verneverdige kyrkjer, medrekna 20 mill. kroner på kap. 882, post 70 Tilskot til sentrale tiltak for kyrkjebygg og gravplassar. Riksantikvaren er gitt i oppgåve å vere tilskotsforvaltar og i samråd med kyrkjelege instansar treffe avgjerd om kva for kyrkjebygg og istandsettings- og sikringstiltak som skal prioriterast for tildeling. Som følgje av meirutgiftene Riksantikvaren har som tilskotsforvaltar i 2019, føreslår BFD å redusere kap. 882, post 70 med 0,4 mill. kroner mot ein tilsvarande auke på kap. 1429, post 01 under Klima- og miljødepartementet.
Ein del av løyvinga under post 70, i alt 5,8 mill. kroner, vil bli tildelt KA (arbeidsgivarorganisasjon for kyrkjelege verksemder), for å få fram auka kunnskap om kyrkjer som er særleg utsette for ras og flaum og gi råd til eigarane av kyrkjene. KA, som har stor kunnskap på kyrkjebyggfeltet, vil også gjere ein tilstandsregistrering av eit utval kyrkjebygg. Auka kunnskap om tilstanden er nødvendig for ein målretta innsats for sikring av dei kulturhistorisk viktige kyrkjene. Spørsmålet om eit bevaringsprogram for kyrkjebygg, jf. Innst. 14 S (2018–2019), vil departementet komme tilbake til i samanheng med oppfølginga av meldinga til Stortinget om Opplysningsvesenets fond, jf. Meld. St. 29 (2018–2019).
Riksantikvaren tildeler tilskot til einskilde kyrkjebygg, mellom anna til brann- og klimasikring, etter søknad. Midlane vil i hovudsak komme til utbetaling til dei aktuelle kommunane i 2020. For å sikre korrekt postbruk og ta omsyn til tidspunkt for utbetaling, føreslår BFD å redusere løyvinga på kap. 882, post 70 med 13,8 mill. kroner mot ein tilsvarande auke på kap. 882, post 61, jf. omtale under post 61.
Overføringa av ansvaret for trus- og livssynssaker frå KUD til BFD omfatta ikkje ansvaret for oppfølginga av utanlandske krigsgraver i Norge. Som følgje av dette blei løyvinga for 2019 på kap. 342 Kirkebygg og gravplasser, post 70 Tilskudd til sentrale tiltak for kirkebygg og gravplasser på 40,5 mill. kroner fordelt på nytt kap. 327 Nidaros domkirkes restaureringsarbeider mv., post 70 Utenlandske krigsgraver i Norge med 3,2 mill. kroner og nytt kap. 882 Kyrkjebygg og gravplassar, post 70 Tilskot til sentrale tiltak for kyrkjebygg og gravplassar med 37,3 mill. kroner, jf. Prop. 57 S (2018–2019) og Innst. 236 S (2018–2019). Nye anslag for behovet for midlar til krigsgravtenesta i 2019 tilseier at ein større del av desse midlane blir fordelte til kap. 327, post 70. BFD føreslår derfor å redusere kap. 882, post 70 med 0,4 mill. kroner mot ein tilsvarande auke på kap. 327, post 70 under Kulturdepartementet.
Samla føreslår BFD å redusere kap. 882, post 70 med 14,6 mill. kroner.
Kap. 2530 Foreldrepengar
Post 70 Foreldrepengar ved fødsel, overslagsløyving
Utgiftene til foreldrepengar ved fødsel i 2019 blir no rekna til 18 860 mill. kroner. Dette er 380 mill. kroner høgare enn gjeldande budsjett. Auken skuldast at fleire foreldre enn tidlegare er venta å få foreldrepengar i 2019. BFD føreslår derfor å auke løyvinga under kap. 2530, post 70 med 380 mill. kroner.
Post 71 Eingongsstønad ved fødsel og adopsjon, overslagsløyving
Utbetalingane til eingongsstønad ved fødsel og adopsjon har til no i år vore noko lågare enn tidlegare lagt til grunn. Utgiftene i 2019 blir no rekna til 810 mill. kroner. BFD føreslår derfor å redusere løyvinga under kap. 2530, post 71 med 50 mill. kroner.
Post 73 Foreldrepengar ved adopsjon, overslagsløyving
Utbetalingane av foreldrepengar ved adopsjon har til no i år vore noko lågare enn tidlegare lagt til grunn. Utgiftene i 2019 blir no rekna til 49 mill. kroner. BFD føreslår derfor å redusere løyvinga under kap. 2530, post 73 med 7 mill. kroner.