2 Endringsforslag
Kap. 4100 Landbruks- og matdepartementet
Post 01 Refusjonar m.m.
På posten blir refusjonar og andre tilfeldige inntekter til departementet førte. Inntektene har vore lågare enn budsjettert, og departementet foreslår difor å redusere løyvinga med 90 000 kroner.
Kap. 1115 Mattilsynet
Post 01 Driftsutgifter
Mattilsynet prioriterer arbeidet mot sjukdommen Chronic Wasting Disease (CWD) høgt. Det blir arbeidd for å fjerne smittestoffet som i dag er funne i Noreg, som det einaste landet i Europa. Det er behov for 10,5 mill. kroner for å dekkje Mattilsynet sine utgifter til eksterne kjøp. Dette kjem i tillegg til at det i samband med revidert nasjonalbudsjett 2017 blei løyvd 15,0 mill. kroner til særskilte kostnader til planlegging og gjennomføring av tiltak for å slå ned CWD, jf. Innst. 401 S (2016–2017). Samtidig gjer lågare etterspurnad enn venta etter Mattilsynets gebyrpliktige ytingar at utgiftene blir reduserte med 2 mill. kroner. Difor foreslår departementet ein auke i løyvinga over kap. 1115, post 01 på 8,5 mill. kroner.
Post 71 Tilskott til erstatningar
Mattilsynet har hatt høgare utgifter enn budsjettert til tilskott til erstatningar etter dyrevelferdslova § 4. Departementet foreslår difor å auke løyvinga over kap. 1115, post 71 med 2,0 mill. kroner.
Kap. 4115 Mattilsynet
Post 01 Gebyr m.m.
I følgje oppdaterte prognosar vil gebyrinntektene til Mattilsynet for 2017 bli på om lag 183,3 mill. kroner. Dette er 10 mill. kroner lågare enn budsjettert. Mindreinntekta skuldast i hovudsak lågare inntekt frå det nye gebyret på tilsyn med fiskehelse og -velferd på grunn av seinare fastsetting av forskrift enn det som var lagt til grunn. Departementet foreslår difor å redusere løyvinga over kap. 4115, post 01 med 10,0 mill. kroner.
Kap. 1142 Landbruksdirektoratet
Post 71 Omstillingstiltak i Indre Finnmark
Departementet foreslår å auke løyvinga med 500 000 kroner, mot tilsvarande reduksjon på kap. 1142, post 80. Meirbehovet er i hovudsak knytt til fjerning av eit ulovleg oppsett gjerde i Aust-Finnmark reinbeiteområde.
Post 72 Erstatningar ved ekspropriasjon og leige av rett til reinbeite
Løyvinga er ei overslagsløyving. Departementet foreslår å auke løyvinga med 165 000 kroner. Meirbehovet er knytt til utbetaling av beiteleige til Trollheimen/ Igelfjellet Reinbeiteforening.
Post 73 Tilskott til erstatningar mv. etter offentlege pålegg i plante- og husdyrproduksjon
Løyvinga er ei overslagsløyving. I følgje dei siste prognosane vil det vere behov for å auke løyvinga med om lag 20 mill. kroner knytt til erstatningar for nedslakting av dyr etter utbrott av MRSA og destruering av prydplanter og tomatar etter skader frå planteskadegjerarar. Departementet foreslår difor å auka løyvinga over kap. 1142, post 73 med 20,0 mill. kroner.
Post 80 Radioaktivitetstiltak
Departementet foreslår å redusere løyvinga over kap. 1142, post 80 med 500 000 kroner, mot ein tilsvarande auke under kap. 1142, post 71.
Kap. 1148 Naturskade – erstatningar
Post 71 Naturskade, erstatningar
Løyvinga er ei overslagsløyving. Løyvinga for 2017 er på 169 mill. kroner. Tilsegn om erstatning for naturskadar blir gitt med ein frist for oppretting innan 3 år. Utbetaling av erstatning skjer først når skaden er retta opp. Det er difor knytt ei tilsegnsfullmakt til posten, som for 2017 er på 40,5 mill. kroner.
På bakgrunn av oppdaterte prognosar for utbetalingar i 2017 og for tilsegn som ikkje er innfridde per 31.12.2017, foreslår departementet å redusere løyvinga på posten med 44 mill. kroner, og å auke tilsegnsfullmakta med 38,5 mill. kroner, til 79 mill. kroner.
Kap. 1149 Verdiskapings- og utviklingstiltak i skogbruket
Post 71 Tilskott til verdiskapingstiltak i skogbruket
Løyvinga for 2017 er på 107,1 mill. kroner. Tilsegn om tilskott til tømmerkaier og skogsvegar blir gitt med ein frist for gjennomføring. Det kan ta noko tid før prosjekta blir ferdige og tilskotta blir betalte ut. Det er difor knytt ei tilsegnsfullmakt til posten, som for 2017 er på 75,0 mill. kroner.
På bakgrunn av oppdaterte prognosar for utbetalingar i 2017, og tilsegn som ikkje er innfridde per 31.12.2017, foreslår departementet å redusere løyvinga på posten med 26,1 mill. kroner, og å auke tilsegnsfullmakta med 26,1 mill. kroner, til 101,1 mill. kroner.
Kap. 1150 Til gjennomføring av jordbruksavtalen m.m.
Post 73 Pristilskott
Løyvinga på posten er på 3 303,5 mill. kroner. På bakgrunn av oppdaterte prognosar ligg det an til eit meirforbruk på posten tilsvarande 127,3 mill. kroner. Av dette utgjer meirforbruk til prisnedskriving av norsk matkorn 77,8 mill. kroner. For kjøtt og for matkorn er det registrert auka volum som gir auka tilskott. Auka volum gir òg auka frakttilskott.
Departementet foreslår å auke løyvinga på posten med 127,3 mill. kroner. Det gir ei samla løyving over posten på 3 430,9 mill. kroner.
Kap. 1151 Til gjennomføring av reindriftsavtalen
Post 51 Tilskott til Utviklings- og investeringsfondet
I tråd med omtale under kap. 1151, post 75 og post 79, foreslår departementet å redusere løyvinga over kap. 1151, post 51 med 3,0 mill. kroner.
Post 75 Kostnadssenkande og direkte tilskott
Departementet foreslår å auke løyvinga over kap. 1151, post 75 med 2,8 mill. kroner, mot tilsvarande reduksjon på kap. 1151, post 51. Meirforbruket er i hovudsak knytt til eit stort slakteuttak og ein betydeleg auke av prisen til reineigar. Auka marknadsretting og pris til reineigar inneber auka utbetalingar av dei produksjonsavhengige tilskotta.
Post 79 Velferdsordningar
Departementet foreslår å auke løyvinga over kap. 1151, post 79 med 200 000 kroner, mot tilsvarande reduksjon på kap. 1151, post 51. Meirforbruket skuldast auka utbetalingar av tilskott for å finansiere leige av avløysarar ved svangerskap/fødsel.
Kap. 4162 Statskog SF – forvaltning av statleg eigarskap
Post 90 Avdrag på lån
På posten blir det ført inntekter frå det statlege lånet Statskog SF fekk ved kjøpet av Borregaard Skoger AS, jf. Prop. 11 S (2010–2011). Gjeldande budsjett for 2017 inneber et låneavdrag på 25 mill. kroner. Styret i Statskog SF har vedteke å betale 75 mill. kroner i avdrag på lånet i 2017. Departementet foreslår difor å auka løyvinga over kap. 4162, post 90 med 50,0 mill. kroner.
Kap. 5651 Aksjar i selskap under Landbruks- og matdepartementet
Post 85 Utbytte
Det er ikkje løyvd midlar over posten for 2017. På generalforsamlinga i Kimen Såvarelaboratoriet AS blei det vedteke utbytte til aksjonærane pålydande til saman 400 000 kroner i 2017. Ettersom staten eig 51 prosent av aksjane, har Kimen Såvarelaboratoriet AS vedtatt å betale inn 204 000 kroner til LMD som aksjeutbyte for 2016.
Departementet foreslår difor å auka løyvinga over kap. 5651, post 85 med 204 000 kroner.
Kap. 5652 Statskog SF – renter og utbytte
Post 80 Renter
På posten blir det ført renter frå det statlege lånet Statskog SF fekk i forbindelse med kjøpet av Borregaard Skoger AS, jf. Prop. 11 S (2010–2011). Renta blir fastsett årleg med utgangspunkt i pengemarknadsrenta og et risikotillegg i tråd med avtale med Statskog SF. Det er forventa at føretaket vil innbetale 1,75 mill. kroner i 2017. Departementet foreslår difor å redusere løyvinga over kap. 5652, post 80 med 1,05 mill. kroner.