Kap. 0001 Svalbard kyrkje

Svalbard kyrkje betener alle som bur på øygruppa. Forutan den norske busetjinga i Longyearbyen og Ny-Ålesund, befolkninga i Barentsburg og den polske befolkninga i Hornsund, blir den òg besøkt av innbyggjarane i Svea og fangstmenn og andre overvintrarar rundt om på Svalbard.

Kyrkja har som mål at også utanlandske busette på Svalbard skal få tilgang på kyrkjelege tenester. Ein søkjer å leggje praktisk til rette for at befolkninga i Barentsburg og polakkane i Hornsund kan betenast av prestar tilhøyrande deira eigne kyrkjesamfunn.

Kyrkja på Svalbard utfører alminnelege kyrkjelege tenester så som gudstenester, dåp, konfirmasjon, vigsel, sørgjegudstenester, sjelesorg og andre kyrkjelege tenester utført av prest og kateket. Peisestova i kyrkja er dessutan samlingsstad både for dei kyrkjelege aktivitetar og for lokalbefolkninga, og den er også mykje besøkt av turistar.

I Longyearbyen har kyrkja eit utstrekt samarbeid med skule, barnehagar og sjukehus. Soknepresten har sete i LRS (lokal redningssentral) og samarbeidet mellom kyrkja og Sysselmannen er godt. Det blir utført tre årsverk ved Svalbard kyrkje. Den foreslegne løyvinga skal dekkje lønsutgifter, varer og tenester som kyrkja står for i sitt arbeid, drift av tenestebil og snøskuter, leige av helikopter, og drift av bustad med meir.

Etter pålegg frå Arbeidstilsynet om utbetringar ved kyrkja, er det teke sikte på at dette arbeidet blir ferdigstilt i 2004.

Kap. 0002 Tilskot til kulturelle formål m.m.

Kap. 0003 Tilskot til Longyearbyen lokalstyre

Longyearbyen lokalstyre vart oppretta frå 1. januar 2002. Samtidig overtok Longyearbyen lokalstyre eigarskapen til Svalbard Samfunnsdrift AS (SSD). Tilskotet til Longyearbyen lokalstyre er på til saman 51,5 mill. kroner. Dette skal dekkje utgiftene til drift av og investeringar i lokalstyret si verksemd.

Svalbard Samfunnsdrift AS har tidlegare hatt ansvaret for dei fleste samfunnsoppgåvene i Longyearbyen. Longyearbyen lokalstyre har vedteke ny organisasjonsmodell som trådde i kraft frå 1. oktober 2002. Organisasjonsmodellen byggjer på bestillar-/utførarprinsippet, der strategiske oppgåver, bestillarfunksjonen og utøving av mynde skjer gjennom Longyearbyen lokalstyre i eigen organisasjon. Sjølve tenesteproduksjonen blir kjøpt av andre og då i hovudsak av Svalbard Samfunnsdrift AS. Som følgje av den nye organisasjonsmodellen vart 6 årsverk overførte frå Svalbard Samfunnsdrift AS til Longyearbyen lokalstyre. Longyearbyen lokalstyre vil sjølv ha ansvaret for samfunns- og arealplanlegging, økonomiplanlegging, næringsarbeid, statistikkproduksjon, utvikling og samordning av samfunnstenester retta mot barn, ungdom og vaksne, barnevern, sosialrådgiving, ungdomsarbeid, barnehagar, i tillegg til oppgåver som politisk sekretariat, og sekretariat for forliksrådet.

Inkludert i oppgåvene til Svalbard Samfunnsdrift AS er produksjon og distribusjon av elektrisk kraft og fjernvarme. Både energiverket og forsyningsnettet (fjernvarmenettet) har behov for store investeringar til vedlikehald, opprusting og modernisering. Samla behov er stipulert til ca. 190 mill. kroner over ein 5-årsperiode. Ein vil også måtte rekne med ytterlegare investeringsbehov i åra som kjem, blant anna dersom det blir stilt krav til reinsing av utsleppa frå energiverket.

Dei totale investeringane i fjernvarmenettet åleine er utrekna til ca. 90 mill. kroner. Det vart for 2003 løyvd 7,1 mill. kroner til Longyearbyen lokalstyre til investeringane i fjernvarmenettet. Denne løyvinga er vidareført for 2004. Longyearbyen lokalstyre har lagt opp ein plan for framdrift og finansiering av investeringane. Det er lagt til grunn at investeringane i fjernvarmenettet skal finansierast ved hjelp av låneopptak og vere ferdigstilte i løpet av 2007. I samband med vurdering av framtidig energiforsyning vil Longyearbyen lokalstyre i 2003 få utgreidd framtidig organisering av energiforsyninga i Longyearbyen. Det er dessutan sett i gang vindmålingar for å kunne vurdere om det er mogleg å bruke vindkraft som ei sekundærkjelde i ei framtidig energiforsyning.

Kap. 0005 Sysselmannen (jf. kap. 3005)

Sysselmannen er regjeringa sin øvste representant på Svalbard, og er som styresmakt tillagt ei rekkje oppgåver og funksjonar. Sysselmannen er administrativt underlagt Justisdepartementet, men er i ulike fagsaker underlagt andre departement. Sysselmannen har blant anna ansvaret for redningsberedskapen, politiverksemda og miljøvernarbeidet på Svalbard. I tillegg er Sysselmannen som offentleg organ tillagt ei rekkje styresmaktoppgåver innanfor ulike saksområde. Fagkompetansen og svalbardkunnskapen hos Sysselmannen representerer ei viktig støtte i departementa sitt arbeid med svalbardsaker.

For Justisdepartementet er det eit mål at dei mange og ulike oppgåvene som sysselmannsbestillinga skal løyse, blir utførte på ein effektiv og god måte. For fagsaker som høyrer under ansvarsfeltet til Justisdepartementet, gjeld dei målsetjingane som er skisserte i St.prp. nr. 1 (2003-2004) Justisdepartementet. Justisdepartementet har ein regelmessig styringsdialog med Sysselmannen, blant anna gjennom etatstyringsmøte, planverk og rapporteringssystem i tilknyting til dette.

Det vart i 2002 utført 29 årsverk ved sysselmannsbestillinga. Inkludert i dette talet er engasjement av ekstrabetjentar og feltinspektørar i sommarmånadene. I tråd med Innst. S nr. 196 (1999-2000) er det kortaste åremålet for statstilsette på Svalbard forlenga ved at ein har forlenga åremålet for tilsette ved sysselmannsbestillinga til 5 år.

Sysselmannen har eiga heimeside på internett, både i norsk og engelsk versjon. Det blir arbeidd med ein russisk versjon. Sidene er under kontinuerleg utvikling. Sysselmannen har ein relativt stor trykksaksproduksjon. Det er i dei seinare åra utarbeidd fleire informasjonshefte, blant anna har Sysselmannen hovudansvaret for å utarbeide og distribuere brosjyremateriell om den nye svalbardmiljølova som trådde i kraft i 2002. Dette materiellet vil i 2003 også bli trykt på engelsk og russisk.

Sysselmannen disponerer monalege utstyrs- og transportressursar, blant anna terrenggåande beltevogner, småbåtar, snøskuterar og utstyr for oljeberedskap. Dette er nødvendig for å kontrollere og halde oppsyn med den 63 000 km² store øygruppa. Saman med helikopter og skip er utstyrsparken nødvendig også for redningsberedskapen på øygruppa. Sysselmannen har i 2003 inngått ny helikopteravtale med verknad frå 1. april 2004, som vil medverke til å styrkje tryggleiken på Svalbard, jf. kap. 6.

Det er for 2004 foreslått å løyve 19,4 mill. kroner over kap. 5 Sysselmannen. Dette er ein auke på 750 000 kroner i forhold til løyvinga for 2003. Løyvinga skal dekkje lønns- og driftsutgifter for sysselmannsbestillinga, under dette utgifter til vedlikehald og fornying av utstyrsparken. Sysselmannen har også monalege representasjonsoppgåver. Justisdepartementet ønskjer med den auka tildelinga i 2004 å leggje til rette for at Sysselmannen kan styrkje politiavdelinga og dermed sikre auka beredskap på Svalbard.

I tillegg er det over Miljøverndepartementet sitt budsjett kap. 1400 foreslått løyvd 0,9 mill. kroner som tilskot til miljøvernarbeidet hos Sysselmannen. Dette er prosjektmidlar og vil i hovudsak bli gitt i form av belastningsfullmakt. Midlane blir utgiftsførte på Miljøverndepartementet kap. 1400.

Justisdepartementet ber Stortinget samtykkje i at departementet i 2004 kan bestille varer for inntil kroner 3 000 000 ut over løyvinga som er gitt under kap. 5 post 01, jf. forslag til vedtak. Svalbardbudsjettet er i stor grad eit driftsbudsjett. Fullmakta er meint å dekkje Sysselmannen sitt behov for større utstyrsinvesteringar over budsjetterminane.

Kap. 3005 Sysselmannen (jf. kap. 5)

Kapitlet korresponderer med kap. 5. Inntektene på post 01 omfattar bøter, gebyr, inndragingar og inntekter ved auksjonar, sal av isbjørnskinn og reinsdyrkjøtt. Bøter blir kravde inn av Statens Innkrevingssentral, men inntektsført Sysselmannen. Sysselmannen mottek diverse refusjonar og får midlar stilte til disposisjon ved posteringsfullmakter. Omfanget av refusjonane varierer frå år til år, og det er vanskeleg å gi eit presist overslag. Av praktiske grunnar blir det derfor budsjettert med 0 kroner på post 02. Det er foreslått at Justisdepartementet får fullmakt til å overskride løyvinga under kap. 5 post 01 tilsvarande det inntektsførte beløpet under kap. 3005, post 02, jf. forslag til vedtak.

Kap. 0006 Sysselmannen si transportteneste (jf. kap. 3006)

Avstandane på Svalbard er store. Det finst ikkje vegsamband eller offentlege kommunikasjonsmiddel for intern transport mellom busetnadene og elles på øygruppa. For å kunne utøve det oppsynet som er nødvendig for å handheve norsk suverenitet, er Sysselmannen heilt avhengig av helikopter og skip. Desse transportmidla er òg heilt nødvendige for ei effektiv politi- og redningsteneste og for ambulanse- og sjuketransport, også utanfor Svalbard sitt territorialfarvatn. Transportmidla blir dessutan nytta til naturoppsyn og førebyggjande arbeid mot miljøkriminalitet. Utan helikopter og skip vil det ikkje vere mogleg å føre eit effektivt tilsyn med verneområde, kulturminne, jakt, ferdsel og turisme også i dei fjerne delane av øygruppa. I 2002 utførte Sysselmannen 18 redningsoppdrag og 22 ambulanseoppdrag. I dei fleste av desse nytta ein Sysselmannen sitt helikopter.

Kapitlet dekkjer stasjonering og drift av to tenestehelikopter. I Innst. S. nr. 156 (2001-2002) om redningshelikoptertenesta i framtida oppmoda justiskomiteen regjeringa om å «snarest mulig skifte ut Sysselmannens helikopter nr. 2 med et annet helikopter med tilsvarende utrustning og kapasitet som helikopter nr. 1.» Den gjeldande kontrakten som Sysselmannen har med Airlift AS går ut 1. april 2004. Sysselmannen inngjekk i juni 2003 ein ny kontrakt med Airlift AS om leige av helikopterteneste som vil gjelde frå 1. april 2004. Kontrakten vart inngått etter framgangsmåten konkurranse med forhandling, og gjeld leige av eit Super Puma AS 332 L1 AW SAR (search and rescue) helikopter og eit AS 365 Dauphin N2 helikopter, begge med avansert redningsutstyr. I forhold til val av helikopter nummer 2, er det fleire argument som ligg til grunn for det valet som er tatt. Samansetjinga av tenestene er vurdert ut frå ei totalvurdering av kva type oppdrag som blir utført for Sysselmannen og kva ressurs helikopter nummer 2 skal vere for redningstenesta i Svalbard-området. Den valde samansetjinga gir etter departementet si vurdering Sysselmannen stor fleksibilitet når ulike SAR-oppdrag skal utførast. Samtidig er samansetjinga særs godt eigna i forhold til den kombinasjonsløysinga som det er lagt opp til på Svalbard, med både rednings- og beredskapsoppdrag og som tenestehelikopter for Sysselmannen sine ulike oppdrag. Den nye avtala inneber auka kostnader samanlikna med den leigeavtala som gjeld i dag. Beløpet til transportteneste er derfor auka med 11,1 mill. kroner samanlikna med St.prp. nr. 1 (2002-2003). Utgiftene vil auke ytterlegare i 2005 på grunn av heilårsverknaden av prisauken frå dette året. Som tidlegare kontrakt føreset ny kontrakt at utleige til andre brukarar skal inntektsførast Sysselmannen, jf. kap. 3006.

Vidare dekkjer kapitlet utgifter til leige av tenestefartøy med helikopterdekk. Kontrakten for leige av tenestefartøy gjekk ut i desember 2002. Ny kontrakt om leige av tenestefartøy med helikopterdekk vart inngått med Rana Ship Service AS 21. juni 2002. Det nye fartøyet vart sett i teneste for Sysselmannen medio mai 2003, og vil vere leigd inn ca. 7 månader kvart år. Skipet er eit isgåande fartøy og er svært viktig både i den generelle beredskapen og for oljevernberedskapen.

Kap. 3006 Sysselmannen si transportteneste (jf. kap. 6)

Kapitlet korresponderer med kap. 6 og viser venta inntekter og refusjonar ved utleige av dei transportmidla som Sysselmannen disponerer. Etter avtale med noverande leverandørar av transporttenester, skal Sysselmannen ha inntektene/refusjonane dersom desse blir nytta av andre. Inntektene knyter seg til utleige til privat verksemd, mens refusjonar gjeld utleige til andre statlege institusjonar. Reduksjonen i venta inntekter skuldast nedgang i talet på helikoptertimar som er leigde av eksterne leigetakarar.

For å skilje mellom inntekter og reine refusjonar vart det ved behandling av St.prp. nr. 67 (1999-2000) oppretta ein post 01 Leigeinntekter og ein post 02 Refusjonar under kap. 3006. Det blir foreslått løyvd kroner 0 på post 02, då refusjonane varierer frå år til år og det er vanskeleg å gi eit presist overslag. Det blir foreslått at Justisdepartementet får fullmakt til å overskride løyvinga under kap. 6 post 01 tilsvarande det inntektsførte beløpet under kap. 3006, post 02, jf. forslag til vedtak.

Kap. 0007 Tilfeldige utgifter

Løyvinga under denne posten er disponert av Justisdepartementet. Posten skal dekkje informasjonstiltak, støtte til utgreiingar, bokprosjekt og liknande, og mindre, ikkje føresette utgifter.

Dei meirutgiftene Telenor har i samband med samfunnspålagte teletenester på Svalbard er dekte over denne posten. Dei årlege utgiftene utgjer 3,5 mill. kroner.

Kap. 0009 Kulturminnetiltak

Kulturminnevernet er ein del av eit samla miljøvern på Svalbard. Kulturminnevernet skal samle og ivareta kunnskap om kulturminne på Svalbard, verne, halde ved like og forvalte kulturminna i samsvar med forskrifter og vedtekne planar, og informere om Svalbard si kulturhistorie, og kulturmiljø og vernetiltak i tilknyting til dette.

Kulturminneplan for Svalbard 2001-2010 låg føre i 2001. Denne dannar grunnlaget for dei forvaltningsstrategiane som er lagt vekt på i kulturminnevernet for Svalbard. Oppfølging av den heilskaplege planen for miljøtiltak i gruveområdet i Ny-Ålesund blir sett i verk i 2003. Sysselmannen har òg lagt fram ein plan for tekniske kulturminne i Longyearbyen. Det blir arbeidd med å føre vidare det haldningsskapande informasjonsarbeidet. Serien med informasjonshefte held fram, og i 2003 blir det utgitt eit hefte om Isfjorden - ei reise gjennom natur og kulturhistorie på Svalbard. Heftet er utgitt på norsk, engelsk og fransk.

Miljøovervakingssystemet for Svalbard og Jan Mayen (MOSJ) er utvikla som eit verktøy for miljøforvaltninga på Svalbard. MOSJ hentar data frå ei rekkje lokalitetar på Svalbard og spenner over alle relevante temaområde. Sysselmannen sit i styringsgruppa for systemet og har også ansvaret for å samle inn, arbeide vidare med og levere data om jakt, ferdsel, forsøpling og kulturminne.

Arbeidet med vedlikehald og kontroll med bygningar og andre kulturminne blir ført vidare i 2003.

Inkludert i planane om Svalbard forskingspark (sjå omtale i del I pkt. 4.3), er også etablering av eit kulturhistorisk magasin med laboratorium og verkstader, og eit miljøinformasjonssenter. Sysselmannen har meldt inn eit rombehov på ca. 500 m².

Kap. 0011 Bergmeisteren

Bergmeisteren for Svalbard vart slått saman med Bergvesenet frå 1. januar 2003. Namnet på den nye etaten er Bergvesenet med Bergmeisteren for Svalbard. Hovudkontoret for etaten er i Trondheim. Kontoret på Svalbard og bergmeisterstillinga for Svalbard er ført vidare.

Bergvesenet med Bergmeisteren for Svalbard administrerer Bergverksordninga for Svalbard, fastsett ved kgl.res. 7. august 1925. Bergverksordninga og utfyllande reglar for petroleumsverksemd regulerer tilgangen til mineralressursane på Svalbard, og dannar basis for etaten si verksemd på øygruppa. Etaten har òg ei viktig rolle i samband med konsekvensutgreiingar knytte til bergverksdrift etter forskrift til Svalbardmiljølova om konsekvensutgreiingar og avgrensing av planområda på Svalbard. Sysselmannen skal i samråd med Bergvesenet med Bergmeisteren for Svalbard fastsetje utgreiingsprogram og sluttdokument i slike saker.

Følgjande verksemdsidé er utarbeidd for etaten: Bergvesenet med Bergmeisteren for Svalbard skal arbeide for at Noreg sine mineralressursar blir forvalta og utnytta til beste for samfunnet. Ut frå denne verksemdsideen er fastsett følgjande hovudmål for den delen av etaten si verksemd som er retta utover:

• effektivt å forvalte gitte fullmakter, og vere sakkyndig organ i saker som gjeld mineralnæringa

• arbeide for å redusere miljøkonsekvensane av mineraluttak, og medverke til ei balansert miljøforvaltning

• arbeide for auka verdiskaping innan mineralnæringa

• arbeide for auka forståing av den verdien mineralnæringa har for samfunnet.

For 2004 vil etaten som tidlegare år prioritere saksbehandling og tilsynsverksemd og sjå til at undersøkingar og uttak av mineral blir gjennomførte slik at også ressurs- og miljøaspekt blir tekne vare på. Det blir elles vist til nærare omtale av etaten under kap. 906 Bergvesenet med Bergmeisteren for Svalbard i Nærings- og handelsdepartementet sin St.prp. nr. 1 (2003-2004).

Kap. 0017 Refusjon til Norsk Polarinstitutt

Norsk Polarinstitutt er underlagt Miljøverndepartementet. Norsk Polarinstitutt har ei omfattande verksemd på Svalbard, med blant anna forsking, miljøovervaking, topografisk og geologisk kartlegging, forskingsservice, drift av forskingsstasjonar, ettersyn av fyr og rådgiving i miljøspørsmål overfor sentrale og lokale forvaltningsorgan. Det meste av budsjettmidlane til instituttet si verksemd på Svalbard blir dekte over kap. 1471.

Instituttet utfører årleg ei rekkje praktiske oppgåver for andre enn miljøvernforvaltninga. Det kan peikast på kartlegging og produksjon av tematiske karttypar tilpassa behovet til ulike brukarar. Dette er eit resultat av nærings- og samfunnsutviklinga på øygruppa, og er ei verksemd som går ut over instituttet sitt opphavlege mandat m.o.t. landkartlegging på Svalbard. Vidare yter Norsk Polarinstitutt årleg omfattande logistisk bistand til norsk og utanlandsk forskingsverksemd på Svalbard, til gjennomføring av offisielle besøk, til nasjonale og internasjonale møte og konferansar, og til Sysselmannen si feltverksemd. Instituttet samarbeider også med Sysselmannen når det gjeld tryggleiksberedskap for feltverksemda på øygruppa. Dette omfattar både etablering av radiodekning og utnytting av instituttet sin materiell- og transportplattform i krisesituasjonar. Saman med Sysselmannen og UNIS gjennomfører Norsk Polarinstitutt Svalbardseminara. Refusjonen skal dekkje utgiftene for instituttet til desse oppgåvene.

Kap. 0018 Fyr og radiofyr

Løyvinga skal dekkje innkjøps- og vedlikehaldsutgifter til navigasjonshjelpemiddel for sjø- og lufttrafikken, blant anna 11 fyrlykter, 27 navigasjonslys, 12 seglingsmerke, og 2 radarfyr. Anlegga er drivne og haldne ved like av Norsk Polarinstitutt. Fyrtenesta er kombinert med instituttet si ekspedisjonsverksemd på Svalbard, slik at transportkostnadene blir reduserte. Kapitlet dekkjer lønskompensasjon for engasjert personell, driftsutstyr, blant anna batteri, fyrlamper og anna teknisk utstyr, og utgifter knytte til synfaringane.

Kap. 0020 Staten sine bygningar i Longyearbyen (jf. kap. 3020)

Kap. 3020 Staten sine bygningar i Longyearbyen (jf. kap. 20)

Kapitlet korresponderer med kap. 0020. Inntektene refererer seg til inntekter frå statlege selskap og etatar som Telenor, Posten, Avinor (Luftfartsverket), Norsk Polarinstitutt og sjukehuset. Alle desse deltek i bustadpoolen som vart oppretta i 2001. Kap. 3020 omfattar også mindre inntekter frå sal av kassert materiell og utstyr, pluss inntekter frå overnattingar på Statsbygg-riggen. Auken i leigeinntekter på kapitlet skuldast i hovudsak inntekter frå nye Avinor-bustader.

Kap. 0022 Likningsforvaltninga for Svalbard

Lov av 29. november 1996 nr. 68 har reglar om skatt til Svalbard på formue og inntekt, under dette likningsforvaltninga for Svalbard. Ved kgl. res. av 12. desember 1997 vart det vedteke at Svalbard skal ha eit eige likningskontor med kontorstad Svalbard. Likningskontoret vart etablert i Longyearbyen i september 1998. Svalbard har eiga likningsnemnd og overlikningsnemnd. Funksjonane som fylkesskattekontor og fylkesskattenemnd for Svalbard er lagt til Troms fylkesskattekontor og Troms fylkesskattenemnd. Likningsrådet for Svalbard, som vart oppretta i medhald av den tidlegare skattelova for Svalbard frå 1925, vart formelt avvikla pr. 1. november 1998.

I tillegg til å utføre likning etter svalbardskattelova, skal likningsforvaltninga rekne ut kolavgift etter lov av 17. juli 1925 nr. 2 om avgift av kull, jordoljer og andre mineral og bergarter som blir utførte frå Svalbard.

Den foreslegne løyvinga skal gå til lønns- og driftsmidlar for likningskontoret i Longyearbyen. Kontoret har to tilsette. Løyvinga skal òg dekkje utgifter til likningsnemnda og overlikningsnemnda for Svalbard, og utgifter til fagleg og administrativ bistand og oppfølging frå Troms fylkesskattekontor. Mål- og resultatstyring av likningskontoret skjer innanfor det ordinære mål- og resultatstyringssystemet for likningsforvaltninga. Auken i løyvinga i 2004 skuldast i stor grad overlapping ved tilsetjing av ny likningssjef, og flytteutgifter knytte til dette. Det er ikkje venta at auken blir vidareført i 2005.

Kap. 3030 Skattar og avgifter

Kap. 3035 Tilskot frå statsbudsjettet

Dette inntektskapitlet tilsvarer det tilskotet som er foreslått løyvd på Justisdepartementet sitt budsjett kap. 480 Svalbardbudsjettet post 50 Tilskot. Løyvinga skal dekkje underskotet på svalbardbudsjettet. Den foreslegne løyvinga er auka frå vedteke budsjett 2003 som ei følgje av ny helikopteravtale for Sysselmannen, husleigekostnader ved Svalbard kyrkje og tankanlegga ved Bjørnøya og Hopen, og justering for prisomrekning.