6 Kredittavtalar mellom Noregs Bank og sentralbankane i andre land. Beredskapstiltak
Finansdepartementet har sidan 1993 hatt ei tidsuavgrensa fullmakt til å ta opp kortsiktige lån i dei internasjonale marknadene innanfor ei samla ramme på 75 000 mill. kroner. Innanfor denne ramma har ein samtidig hatt fullmakt til å godkjenne at Noregs Bank kunne trekke på eventuelle kredittlinjer med andre sentralbankar og med internasjonale økonomiske organisasjonar og institusjonar.
Departementet har på grunnlag av fullmakta godkjent at Noregs Bank kan ta opp lån under sine avtalar med nordiske sentralbankar og sentralbankar i EU, seinast ved fornyinga frå 1. januar 1999. Som følgje av omlegginga av pengepolitikken i mars 2001, bad ikkje Noregs Bank om ei fornying av avtalane med Den europeiske sentralbanken og Bank of England då desse forfall ved utgangen av 2001. Av same grunn sa Noregs Bank i juni i år opp avtalane med sentralbankane i Sverige, Danmark og Island. Noregs Bank har dermed ikkje lenger slike avtaler med andre sentralbankar.
Staten har i perioden sidan fullmakta blei gitt ikkje tatt opp kortsiktige lån i dei internasjonale marknadene. Ein ser heller ikkje for seg at staten vil ha eit slikt behov i dei næraste åra. Skulle slik opplåning på nytt bli aktuelt, er det departementets vurdering at ein vil be Stortinget om ny fullmakt.