Sterk vekst i kultur- og likestillingsbudsjettet

– Vi tek aktive grep for å legge til rette for at alle kan delta i kulturlivet, idretten og i frivillige organisasjonar, uansett bakgrunn og kvar ein bur. Vi vil at alle skal kunne ha fridomen til å leve gode og trygge liv slik dei sjølv ønsker. Samfunnet vårt blir betre og rikare av at så mange som mogleg deltek i fellesskapa våre, seier kultur- og likestillingsminister Lubna Jaffery.

Det foreslåtte kulturbudsjettet for 2024 er det største nokon gong.

Hovudprioriteringar kunst, kultur og film

• Regjeringa vil satse på lokal og regional kultur, og foreslår auka driftstilskot til fleire museum, kulturbygg og kulturinstitusjonar over heile landet. I tillegg foreslår regjeringa å fordele 50 millionar kroner i eingongstilskot til lokale kulturtiltak og prosjekt.
• Regjeringa vil styrke kunstnarøkonomien. Regjeringa foreslår å auke løyvingane til Statens kunstnarstipend med 20 millionar kroner for mellom anna å opprette 44 nye stipendhjemlar, samt 15 millionar kroner øyremerkte til vederlag og honorar til kunstnarar.
• Regjeringa vil styrke satsinga på film og dataspel med 40 millionar kroner, samt auke ramma til insentivordninga med 30 millionar kroner.
• Regjeringa vil etablere ei tilskotsordning for scenekunstgrupper som har vore verksame over lang tid og foreslår å sette av 26 millionar kroner til ordninga.
• Regjeringa foreslår å styrke satsinga på språk, leselyst og litteraturformidling med 11 millionar kroner.

Hovudprioriteringar frivilligheit og idrett

• Regjeringa vil legge til rette for full momskompensasjon for frivilligheit og idrett, og foreslår å auke løyvingane til momsordningane med vel 500 millionar kroner.
• Idretten og kulturtilbodet skal være like tilgjengeleg for alle barn uavhengig av bakgrunn og bustad. I haust startar regjeringa med å lage ein handlingsplan for deltaking, og foreslår 10 millionar kroner til å følge opp i 2024.
• Regjeringa held fram satsinga på frivilligsentralane og foreslår å auke tilskota med 38 millionar kroner.
• Regjeringa foreslår å løyve 5,5 millionar kroner til kartlegging av kunstgrasbanene i Noreg, og behovet på sikt for å erstatte gummigranulat med eit meir berekraftig alternativ.

Hovudprioriteringar likestilling og mangfald

• Regjeringa vil løfte arbeidet for likestilling og mot diskriminering, og foreslår å auka løyvingar på området med 18 millionar kroner.
• Regjeringa vil auke satsinga på samisk kultur og nasjonale minoritetar og foreslår mellom anna meir støtte til Beaivváš, Dáiddadállu og Kväänteatteri.
  
  

• Kultur- og likestillingsbudsjettet samla